«Եթե Իսրայելը շարունակի հարվածներ հասցնել Լիբանանին, Իրանը կլքի հրադադարի ռեժիմը», - Թեհրանում գործող Tasnim գործակալության փոխանցմամբ` այս մասին հայտարարել են երկրի բարձրագույն իշխանությանը մոտ կանգնած աղբյուրները։
Մեկ այլ իրանական լրատվամիջոցի՝ Fars գործակալության տեղեկություններով՝ Իսլամական Հանրապետության ռազմածովային ուժերը Իսրայելի կողմից Լիբանանին հասցված հարվածներից անմիջապես հետո դադարեցրել են նավթային լցանավերի շարժը Հորմուզի նեղուցով։
Իրանի ռազմածովային ուժերը զգուշացրել են, որ ցանկացած նավ, որ կփորձի հատել Հորմուզի նեղուցն առանց Թեհրանի պաշտոնական թույլտվության, ոչնչացվելու է։ Այս մասին Իրանի զինված ուժերը զգուշացրել են այսօր նշելով, որ Հորմուզի նեղուցը շարունակում է փակ մնալ անխոչընդոտ ծովային հաղորդակցության համար։
«Ցանկացած նավ, որ բաց ծով դուրս կգա առանց մեր թույլտվության կթիրախավորվի և կոչնչացվի», - իրանցի զինվորականների հայտարարությունն է մեջբերում Reuters գործակալությունը։
Ադրբեջանի նախագահ Իլհամ Ալիևն այսօր կայացած հեռախոսազրույցի ժամանակ շնորհավորել է իր իրանցի պաշտոնակից Մասուդ Փեզեշքիանին՝ ԱՄՆ հետ ձեռք բերված հրադադարի առթիվ։
Չնայած հրադադարի կնքմանը՝ Իսրայելն այսօր հուժկու հարվածներ է հասցրել Լիբանանի մայրաքաղաք Բեյրութի կենտրոնական թաղամասերին։ Նախնական տեղեկությունների համաձայն՝ այս հարվածներն ամենաուժգինն էին պատերազմի սկզբից ի վեր։
Լիբանանի առողջապահության նախարարության տեղեկություններով՝ հարվածների հետևանքով տասնյակ զոհեր և հարյուրավոր վիրավորներ կան, դրանց հստակ թիվը ճշտվում է։ Իսրայելի պաշտպանության նախարար Կացը հայտարարել է՝ իր երկիրը պահանջում է, որ Իրանի հետ կնքված հրադադարը չտարածվի Լիբանանի վրա։
«Մենք պետք է փոխենք Լիբանանում առկա իրողությունները՝ Իսրայելի հյուսիսային շրջանների բնակչության անվտանգությունն ապահովելու համար»,- ասել է Իսրայել Կացը։
Հայաստանը ողջունում է ԱՄՆ-ի և Իրանի միջև հրադադարի մասին որոշումը, հայտարարել է վարչապետ Նիկոլ Փաշինյանը:
«Հայաստանը ողջունում է ԱՄՆ-ի և Իրանի միջև կայացված կարևորագույն որոշումը՝ դադարեցնել բոլոր ռшզմական գործողությունները: Մենք նաև բարձր ենք գնահատում միջնորդական ջանքերը, այդ թվում՝ Պակիստանի ջանքերը, և համոզված ենք, որ դիվանագիտությունը պետք է գերակշռի բոլոր չլուծված հարցերը կարգավորելու և Մերձավոր Արևելքում խաղաղությունը պահպանելու համար», - X-ի իր էջում գրել է Փաշինյանը։
Հռոմի պապը ողջունել է երկշաբաթյա հրադադարի մասին հայտարարությունը
Հռոմի պապ Լեոն 14-րդն այսօր հայտարարել է, որ «մեծ գոհունակությամբ» ողջունում է Իրանի պատերազմում երկշաբաթյա հրադադարի մասին հայտարարությունը։
«Մերձավոր Արևելքի և ամբողջ աշխարհի համար վերջին ժամերի մեծ լարվածության լույսի ներքո ես գոհունակությամբ ողջունում եմ... երկշաբաթյա անհապաղ զինադադարի մասին հայտարարությունը», - ասել էՀռոմի պապը:
Թուրքիան հայտարարել է, որ կաջակցի Իսլամաբադում կայանալիք բանակցություններին
Թուրքիան ողջունել է Իրանի պատերազմում հրադադարը և հայտարարել, որ կաջակցի Իսլամաբադում կայանալիք բանակցություններին, այս մասին այսօր հայտարարել է Թուրքիայի արտաքին գործերի նախարարությունը։
Գերատեսչությունն ընդգծել է հրադադարի ռեժիմի լիարժեք կիրառման անհրաժեշտությունը և նշել, որ բոլոր կողմերը պետք է հետևեն համաձայնագրին։
Իրանական ISNA լրատվական գործակալության փոխանցմամբ՝ ուրբաթ օրը Իսլամաբադում սպասվող բանակցություններին Իրանի պատվիրակությունը կղեկավարի երկրի խորհրդարանի խոսնակ Մոհամմադ Բաղեր Ղալիբաֆը: Ամերիկյան բանակցային թիմը կգլխավորի ԱՄՆ փոխնախագահ Ջեյ Դի Վենսը:
«Հետքայլ՝ անդունդի եզրից». Կալլասը ողջունել է ԱՄՆ-Իրան երկշաբաթյա հրադադարը
ԵՄ արտաքին քաղաքականության ղեկավար Կայա Կալասն այսօր ողջունել է Միացյալ Նահանգների և Իրանի միջև երկշաբաթյա հրադադարը՝ այն համարելով «հետքայլ՝ անդունդի եզրից»:
«Պակիստանի միջնորդությամբ ձեռք բերված հրադադարը «ստեղծում է խիստ անհրաժեշտ հնարավորություն՝ նվազեցնելու սպառնալիքները, դադարեցնելու հրթիռային հարձակումները, վերականգնելու նավագնացությունը և դիվանագիտության համար տարածք ստեղծելու՝ երկարատև համաձայնության հասնելու ուղղությամբ», X-ում գրել է Կալլասը:
«ԵՄ-ն պատրաստ է աջակցել այդ ջանքերին և կապի մեջ է տարածաշրջանի գործընկերների հետ», - հավելել է ԵՄ բարձրաստիճան դիվանագետը:
Մակրոնը կոչ է արել Լիբանանին ներգրավել համաձայնագրում
Ֆրանսիայի նախագահ Էմանյուել Մակրոնը հայտարարել է, որ ողջունում է Իրանի և Միացյալ Նահանգների միջև հրադադարը, սակայն հավելել է, որ Լիբանանում իրավիճակը շարունակում է մնալ կրիտիկական և կոչ է արել Լիբանանին ներգրավել համաձայնագրի մեջ։