Մեծ Բրիտանիայի Ծովային առևտրի գործողությունների կենտրոնը (UKMTO), որը բրիտանական ռազմածովային համակարգող կառույց է և հետևում է առևտրային նավերի անվտանգության սպառնալիքներին, նախազգուշացում է տարածել՝ հայտնելով, որ Հորմուզի նեղուցի մոտ «կասկածելի, սակայն դեռևս չպարզված արկից վնասվել է կոնտեյներային նավ»։
Կենտրոնը նաև նշել է, որ «անձնակազմի բոլոր անդամները անվտանգ են, և նրանց գտնվելու վայրը հայտնի է»։
Իրանի նոր գերագույն առաջնորդ Մոջթաբա Խամենեին, չնայած պատերազմի ընթացքում ստացած վնասվածքներին, «ողջ ու առողջ է», հայտարարել է կառավարության խորհրդական, նախագահի որդի Յուսեֆ Փեզեշքիանը։
Նա տելեգրամյան իր ալիքում գրել է, որ Խամենեիի վիրավորվելու մասին լուրերից հետո ճշտել է այդ տեղեկությունները և պատասխան ստացել, որ նա առողջ է։
Ավելի վաղ իրանական պետական հեռուստատեսությունը Խամենեիին անվանել էր «Ռամադանի պատերազմի վիրավոր վետերան», սակայն չէր հստակեցրել, թե ինչ վնասվածք է ստացել։
New York Times-ի հաղորդմամբ՝ Մոջթաբա Խամենեին վիրավորվել է ԱՄՆ-ի և Իսրայելի հարձակումների առաջին օրը։
ԱՄՆ զինված ուժերը հայտարարել են, որ Հորմուզի նեղուցի մոտ հարվածել և ոչնչացրել են ականներ տեղադրող 16 իրանական նավ։ CNN-ը, հղում անելով հետախուզական աղբյուրներին, հայտնել է, որ վերջին օրերին Իրանը նեղուցում տեղադրել է մի քանի տասնյակ ական և կարող է տեղադրել ևս հարյուրավորներ։
Հորմուզի նեղուցով անցնում է աշխարհի նավթի մոտ մեկ հինգերորդը, և Իրանի Իսլամական հեղափոխության պահապանների կորպուսը շաբաթվա սկզբին հայտարարել էր, որ եթե ԱՄՆ-ի և Իսրայելի հարվածները շարունակվեն, տարածաշրջանից «նույնիսկ մեկ լիտր նավթ» դուրս չի գա։
Իրանի ոստիկանապետ Ահմադ-Ռեզա Ռադանը պետական հեռուստատեսությամբ հայտարարել է, որ ով «թշնամու կոչով» փողոց դուրս գա, կդիտվի ոչ թե որպես ցուցարար, այլ որպես թշնամի։ Նրա խոսքով՝ ուժայինները պատրաստ են «թշնամու պես» վարվել նման մարդկանց հետ, իսկ անվտանգության ուժերը շուրջօրյա գտնվում են փողոցներում։
Այս հայտարարությունը հնչել է այն բանից հետո, երբ վերջին շաբաթներին թե՛ Դոնալդ Թրամփը, թե՛ Բենիամին Նեթանյահուն իրանցիներին կոչ էին անում դուրս գալ փողոց և տապալել իշխանություններին։
Իրանի Իսլամական հեղափոխության պահապանների կորպուսը հայտարարել է, որ առնվազն երկու հրթիռ է արձակվել Քուվեյթում գտնվող ամերիկյան բազայի ուղղությամբ։
«Արիֆջան ամերիկյան բազային հարված է հասցվել ԻՀՊԿ ցամաքային ուժերի հրթիռային ստորաբաժանման կողմից արձակված 2 հրթիռով», - ըստ Fars-ի և Mehr-ի՝ հայտարարել են պահապանները՝ նկատի ունենալով Քուվեյթ քաղաքի հարավում գտնվող Քեմփ Արիֆջան բազան։
Քուվեյթի իշխանությունները մինչ այժմ չեն մեկնաբանել այս տեղեկությունները։
Իրանը հայտարարել է, որ ռազմական գործողությունների սկսվելուց ի վեր սկսել է Իսրայելի և տարածաշրջանում ամերիկյան թիրախների վրա «ամենաինտենսիվ» և զանգվածային հարձակումը:
«Մեր նպատակները շատ հստակ են, և մենք հասնում ենք այդ նպատակների իրագործմանը»,- մեկնաբանելով Իրանի դեմ ընթացող պատերազմը՝ այսօր հայտարարել է Պենտագոնի ղեկավար Փիթ Հեգսեթը։
«Առաջին հերթին մենք ոչնչացնում ենք իրանցիների հրթիռային զորանոցը և այդ հրթիռների արձակման համար օգտագործվող հարթակները։ Երկրորդը՝ մենք ոչնչացնում ենք նրանց ռազմածովային ուժերը», - ասել է նա։
Երրորդ նպատակը Իրանի կողմից միջուկային զենքի ստեղծման բացառումն է, հայտարարել է Հեգսեթը՝ հավելելով. «Մենք հաղթում ենք»։
Ադրբեջանը մարդասիրական օգնություն է ուղարկել Իրան։
Հարևան երկիր առաջին անհրաժեշտության իրերով բեռնված մեքենաների շարասյուն ուղարկելու որոշումը կայացվել է երկու երկրների նախագահներ Իլհամ Ալիևի և Մասուդ Փեզեշքիանի՝ մարտի 8-ին կայացած հեռախոսազրույցից հետո։
Ադրբեջանական կողմն Իրան է ուղարկել 10 տոննա ալյուր, 6 տոննա բրինձ, ավելի քան 4 տոննա խմելու ջուր, 600 կիլոգրամ թեյ և ավելի քան երկու տոննա դեղորայք։
«Իրանական խնդրի կարգավորման այն առաջարկները, որ ներկայացրել էր նախագահ Պուտինը, շարունակում են ուժի մեջ մնալ», - այսօր հայտարարել է Կրեմլի պաշտոնական ներկայացուցիչ Դմիտրի Պեսկովը։
«Դեռ մինչև իրանական հակամարտության ռազմական փուլի մեկնարկը նախագահ Պուտինը տարբերակներ ու լավ առաջարկներ էր առաջ քաշել, որոնք թույլ կտային նվազեցնել լարվածությունը։ Նախօրեին Ռուսաստանի նախագահ ասել է, որ այդ առաջարկներից շատերը դեռ սեղանին են։ Ռուսաստանը պատրաստ է և ուրախ կլինի առավելագույն օժանդակություն ցուցաբերել», - նշել է Կրեմլի խոսնակը։
Թուրքիան հայտարարում է, որ ԱՄՆ-ի Patriot հակաօդային պաշտպանության համակարգը տեղակայվել է երկրի հարավարևելքում՝ ՆԱՏՕ-ի ռադարային բազայի մոտ, որպես դաշինքի քայլերից մեկը՝ ուժեղացնելու օդային պաշտպանությունը Իրանի պատերազմի պայմաններում առաջացած հրթիռային սպառնալիքների դեմ։
Այն տեղակայվում է Մալաթիա նահանգում, որտեղ գտնվում է ՆԱՏՕ-ի ռադարային բազան, որը կարևոր տվյալներ է տրամադրում դաշինքի համար և օգնել է վերջին շաբաթվա ընթացքում հայտնաբերել Թուրքիայի ուղղությամբ երկու իրանական բալիստիկ հրթիռներ։
Իսրայելական «12-րդ ալիքը», իր աղբյուրներին հղում անելով, հայտնում է, որ Իսրայելը երեկ հարվածել է Թեհրանում գտնվող միջուկային լաբորատորիաների։
Իրանը դեռ չի մեկնաբանել:
Իրանական ISNA գործակալության փոխանցմամբ՝ Իրանից արևմուտք գտնվող Արակ քաղաքում բնակելի շենքին ավիահարվածից հինգ մարդ է սպանվել, մի քանիսը՝ վիրավորվել։