ԱՄՆ պետքարտուղարը մեղադրել է Իրանին ամբողջ աշխարհին պատանդառելու մեջ: Մարկո Ռուբիոն վստահեցրել է, որ Միացյալ Նահանգները հաջողությամբ է իրականացնում իր ռազմական նպատակները պատերազմում։
«Այս հոգևորական ռեժիմը վտանգ է ներկայացնում ինչպես տարածաշրջանի, այնպես էլ ամբողջ աշխարհի համար։ Իրանը փորձում է պատանդ վերցնել ամբողջ աշխարհը։ Նրանք հարձակվում են հարևան երկրների, նրանց էներգետիկ ենթակառուցվածքների, քաղաքացիական բնակչության վրա։ Այս առաքելության նպատակը նրանց կարողությունները ոչնչացնելն է, և մենք լավ ճանապարհի վրա ենք՝ հասնելու դրան», - հայտարարել է պետքարտուղարը։
Human Rights Watch-ը մեղադրել է Իսրայելին վերջին շաբաթվա ընթացքում Լիբանանի հարավում բնակելի շրջանում սպիտակ ֆոսֆոր օգտագործելու մեջ։ Այսօր հրապարակած հաշվետվությունում հեղինակավոր միջազգային իրավապաշտպան կազմակերպությունը նշել է, որ հաջողվել է աշխարհագրականորեն տեղայնացնել յոթ այդպիսի դեպք։
Իսրայելի բանակը դեռ չի մեկնաբանել այս մեղադրանքը։
Ուկրաինայի նախագահ Վլադիմիր Զելենսկին այսօր հայտարարել է, որ Իրանի անօդաչու թռչող սարքերից պաշտպանվելու հարցով 11 երկրներ դիմել են Կիևին օգնության համար։
«Կան հստակ հետաքրքրություններ Ուկրաինայի փորձի նկատմամբ, որը վերաբերում է կյանքի պաշտպանությանը, համապատասխան անօդաչու կասեցնող սարքերին, էլեկտրոնային պատերազմների համակարգերին և ուսուցմանը», - ասել է Ուկրաինայի նախագահը՝ չնշելով, սակայն, թե որոնք են այդ երկրները։
Զելենսկին առաջարկել է փոխանակել Կիևի անօդաչու կասեցնող սարքերը հակաօդային պաշտպանության թանկարժեք հրթիռների հետ, որոնց պակասն ունի Ուկրաինան։
Հայաստանի վարչապետ Նիկոլ Փաշինյանը շնորհավորական ուղերձ է հղել Իսլամական հեղափոխության գերագույն առաջնորդ Սեյեդ Մոջթաբա Խամենեիին՝ գերագույն առաջնորդի պաշտոնում ընտրվելու առիթով:
«Շնորհավորում եմ Ձեզ Իսլամական հեղափոխության գերագույն առաջնորդի պաշտոնում ընտրվելու առիթով: Վստահ եմ, որ Հայաստանի և Իրանի միջև ամուր կապերը կշարունակեն զարգանալ՝ գրանցելով նոր հաջողություններ: Առիթը պատեհ համարելով՝ Իրանի բարեկամ ժողովրդին մաղթում եմ բարօրություն և հարատև խաղաղություն», - ուղերձում նշել է Փաշինյանը։
ՆԱՏՕ-ի ուժերը հարվածել են իրանական բալիստիկ հրթիռի, որը մտել էր Թուրքիայի օդային տարածք։ Լուրը հաղորդում է Թուրքիայի պաշտպանության նախարարությունը։
Ֆրանսիայի նախագահ Էմանյուել Մակրոնն այսօր ժամանել է Կիպրոս՝ քննարկելու տարածաշրջանային անվտանգության հարցերը։ Մակրոնը Պաֆոս է հասել, հանդիպել նախագահի՝ Նիկոս Քրիտոդուլիդիսի և վարչապետ Կիրակոս Միցոտակիսի հետ։
Ֆրանսիան Միջերկրական ծով էր տեղափոխել ռազմական նավեր, այդ թվում՝ «Charles de Gaulle» ավիակիր նավը, ֆրիգատ և հակաօդային պաշտպանական միավորներ, որպեսզի ամրապնդի պաշտպանությունը այդ տարածաշրջանում և ցույց տա իր աջակցությունը Կիպրոսին։
Լիբանանի խորհրդարանը որոշել է երկու տարով հետաձգել այս տարվա մայիսին նախատեսված խորհրդարանական ընտրությունները։ Այդ մասին հայտարարել է խորհրդարանի նախագահը՝ ընդգծելով, որ որոշումը պայմանավորված է պատերազմով, որը ծավալվել է Իրանի աջակցությունը վայելող «Հեզբոլա» խմբավորման և Իսրայելի միջև։
Իրանը մեղադրել է եվրոպական երկրներին ԱՄՆ-ի և Իսրայելի համար պայմաններ ստեղծելու համար, որոնք հանգեցրել են Իսլամական Հանրապետության վրա հարձակմանը։
«Եվրոպական երկրները, ցավոք, օգնել են ստեղծել այդ պայմանները։ Իրավունքի գերակայության վրա պնդումներ անելու, Միացյալ Նահանգների ճնշումներին ու գերազանցումներին դիմակայելու փոխարեն նրանք ՄԱԿ-ի Անվտանգության խորհրդում համաձայնեցին նրանց հետ՝ պատժամիջոցների վերականգնման հարցի քննարկման ժամանակ», - լրագրողների հետ ճեպազրույցի ժամանակ ասել է Իրանի ԱԳՆ խոսնակ Էսմայիլ Բաղային։
Իրաքը ՖԻՖԱ-ին խնդրել է հետաձգել Աշխարհի առաջնության փլեյ-օֆֆի հանդիպումը Մերձավոր Արևելքում պատերազմի պատճառով։
Իրաքի ազգային հավաքականը դիմել է ֆուտբոլի ղեկավար մարմնին` խնդրելով այլընտրանքային լուծում գտնել այս ամսվա վերջում նախատեսված Աշխարհի առաջնության փլեյ-օֆֆի խաղի համար: Իրաքը մարտի 31-ին Մեքսիկայի Մոնտերեյ քաղաքում պետք է խաղա Սուրինամ-Բոլիվիա դիմակայության հաղթողի հետ՝ փորձելով ապահովել մասնակցությունն իր առաջին Աշխարհի առաջնությանը1986 թվականից հետո։
Սակայն Մերձավոր Արևելքում ընդլայնվող հակամարտությունը խառնաշփոթ է առաջացրել թիմի նախապատրաստական աշխատանքներում։
Միացյալ Նահանգները դեռևս չի դիմել լուրջ գործողությունների՝ Իրանի դեմ ռազմական արշավում իր նպատակներին հասնելու համար, CBS News հեռուստաալիքին տված հարցազրույցում ասել է Պենտագոնի ղեկավար Փիթ Հեգսեթը։
«Սա դեռ միայն սկիզբն է։ Մենք անգամ ամբողջովին չենք սկսել արշավը, որն ավելի տեսանելի ցույց կտա՝ ինչպես ենք իրականացնելու մեր նպատակները», - ասել է Հեգսեթը՝ հավելելով՝ «այժմ ամեն ինչ ընթանում է ըստ ծրագրի»։
Պենտագոնի ղեկավարի պնդմամբ՝ ամերիկյան հնարավորությունները «շատ ավելի մեծ են, քան Իրանինը»։