Միացյալ Նահանգները դեռևս չի դիմել լուրջ գործողությունների՝ Իրանի դեմ ռազմական արշավում իր նպատակներին հասնելու համար, CBS News հեռուստաալիքին տված հարցազրույցում ասել է Պենտագոնի ղեկավար Փիթ Հեգսեթը։
«Սա դեռ միայն սկիզբն է։ Մենք անգամ ամբողջովին չենք սկսել արշավը, որն ավելի տեսանելի ցույց կտա՝ ինչպես ենք իրականացնելու մեր նպատակները», - ասել է Հեգսեթը՝ հավելելով՝ «այժմ ամեն ինչ ընթանում է ըստ ծրագրի»։
Պենտագոնի ղեկավարի պնդմամբ՝ ամերիկյան հնարավորությունները «շատ ավելի մեծ են, քան Իրանինը»։
Արդեն 10-րդ օրն ընթացող պատերազմի հետևանքով Հորմուզի ծոցը շարունակում է փակ մնալ, ինչի հետևանքով նավթի գինը անցել է 115 դոլարը:
Իսրայելը շարունակել է հարվածները Իրանի աջակցությունը վայելող «Հեզբոլա»-ի օբյեկտներին մի քանի շրջաններում, այդ թվում՝ Բեյրութում:
Արևմուտքի կողմից ահաբեկչական ճանաչված «Հեզբոլա»-ն իր հերթին հայտարարել է, որ երկրի հարավում թիրախավորել է իսրայելական զորքը:
Իրանն այսօր շարունակել է հարվածները Ծոցի երկրներին: Քուվեյթում թիրախավորել են միջազգային օդանավակայանը, երկու սահմանապահ է սպանվել:
Բահրեյնում էլ հարվածել են երկրի ամենամեծ նավթավերամշակման գործարանին՝ BAPCO-ին: Բահրեյնում առնվազն 32 վիրավոր կա:
ԱՄՆ պաշտպանության նախարար Փիթ Հեգսեթը CBS-ին տված հարցազրույցում ասել է, որ Իրանը չի կարող երկար շարունակել պատերազմը և ժամանակի ընթացքում կհասկանա դա: Ըստ Հեգսեթի՝ ԱՄՆ-ն, մինչդեռ, պատրաստ է այնքան շարունակել պատերազմը, որքան անհրաժեշտ է հաջողության համար:
«Ոմանք սխալվում են՝ մտածելով, թե մեր կամքը, մեր հնարավորությունները կամ մեր զինամթերքը կարող են սահմանափակ լինել։ Նրանք սխալվում են։ Իրանցիները սխալվում են և սխալ հաշվարկ են անում ԱՄՆ կամքի, զինամթերքի վերաբերյալ։ Մենք դեռ նոր ենք սկսել պատերազմը», - ասել է նա:
Իրանի պատմության մեջ առաջին անգամ է, որ հոգևոր առաջնորդին փոխարինում է նրա որդին: Մոջթաբա Խամենեին խորհրդավոր ֆիգուր է. նա հազվադեպ է հայտնվել հանրության մեջ, և շատ իրանցիներ նրան երբեք չեն տեսել հրապարակային ելույթ ունենալիս:
Ըստ իրանական լրատվամիջոցների՝ այդուհանդերձ, նա ազդեցություն ունի գերագույն առաջնորդի ինստիտուտին և ուժային կառույցներին մոտ շրջանակներում։
Լուսանկարներում իրանցիները տեղեկանում են նրա ընտրության մասին.
Թուրքիան վեց F-16 կործանիչ և ՀՕՊ համակարգեր է տեղակայել Հյուսիսային Կիպրոսում՝ Իրանի հետ պատերազմի պայմաններում թուրք բնակչության անվտանգությունը բարձրացնելու համար, հայտարարել է Պաշտպանության նախարարությունը:
Գերատեսչությունը հավելել է, որ անհրաժեշտության դեպքում Անկարան կձեռնարկի լրացուցիչ միջոցներ։
Այսօր առավոտյան վերականգնվել է Ադրբեջանի և Իրանի միջև պետական սահմանով բոլոր տեսակի տրանսպորտային միջոցներով (ներառյալ տարանցիկ) ապրանքների տեղափոխման մուտքն ու ելքը, հայտնում են ադրբեջանական լրատվամիջոցները:
Որոշումը կայացվել էր մարտի 5-ին՝ Նախիջևանին հարվածից հետո:
Բահրեյնի «Բապկո» նավթավերամշակման գործարանից ծուխ է բարձրանում, Իրանի հարվածներից հետո Reuters-ին փոխանցել են ականատեսները:
Բահրեյնի կառավարությունն ավելի վաղ հայտնել է Սիտրա շրջանում իրանական անօդաչուների հարձակման հետևանքով տուժածների և ավերածությունների մասին:
Սա Բահրեյնի գլխավոր նավթավերամշակման գործարանն է և երկրի էներգետիկ ոլորտի առանցքային օբյեկտը:
Օմանի Մասկատի միջազգային օդանավակայանը խնդրել է մասնավոր ինքնաթիռների օպերատորներին զերծ մնալ օդանավակայանը «լրացուցիչ չվերթների» համար օգտագործելուց՝ առաջնահերթությունը տալով կառավարական և առևտրային չվերթներին: Այս մասին գրում է Reuters-ը՝ հղում անելով էլեկտրոնային նամակի։
«Մասկատի միջազգային օդանավակայանում ճգնաժամային կառավարման ներկայիս միջոցառումների պատճառով ինքնաթիռների տեղաշարժը սահմանափակվում է միայն հաստատված սեզոնային կանոնավոր չվերթներով», - օդանավակայանի իշխանությունները տեղեկացրել են չարթերային չվերթների օպերատորներին։