Իսրայելական բանակը շարունակել է Թեհրանի ռմբակոծությունը՝ օգտագործելով 80 կործանիչ
Ավելի վաղ Իրանից լուրեր էին ստացվել, որ Թեհրանի Էկբաթան քաղաքի և «Մեհրաբադ» օդանավակայանի մոտակայքում ծանր օդային հարվածներ են հասցվել, և որ Նազիաբադի 16-րդ շրջանի համայնքը նույնպես ավիահարվածի թիրախ է դարձել։
Իրանի նախագահ Մասուդ Փեզեշքիանը շաբաթ օրը հայտարարել է, որ երկրի ժամանակավոր ղեկավար խորհուրդը հաստատել է հարևան երկրների դեմ հարձակումների դադարեցումը, եթե այդ երկրներից Իրանի դեմ հարձակում չլինի, հայտնում է Reuters-ը։
Գերմանիայի կանցլեր Ֆրիդրիխ Մերցը հայտարարել է, որ Բեռլինը համագործակցում է գործընկերների հետ՝ Իրանի հետ մարտական գործողությունները դադարեցնելու մոտեցում գտնելու համար: Նա նաև զգուշացրել է, որ չպետք է թույլ տալ, որ երկիրը ընկնի քաոսի մեջ, քանի որ պատերազմը տարածվում է Մերձավոր Արևելքում։
Մերցը նշել է, որ Գերմանիան կիսում է Միացյալ Նահանգների և Իսրայելի նպատակները՝ կանգնեցնել Թեհրանի միջուկային ծրագրերը։ Նա նաև ընդգծել է, որ Իրանի ժողովուրդն իրավունք ունի ինքնուրույն որոշելու իր ապագան։
«Սակայն, քանի որ մարտերը շարունակվում են և տարածվում, մենք նաև տեսնում ենք աճող ռիսկեր: Անվերջ պատերազմը մեր շահերից չի բխում», - ասել է Գերմանիայի կանցլերը հայտարարության մեջ։
Ռազմական գործողությունների մեկնարկից ի վեր Կատարում ՀՀ դեսպանության հետ կապ է հաստատել Կատարի տարածքում տարանցիկ գտնվող ՀՀ 41 քաղաքացի, հայտնում է ՀՀ ԱԳՆ խոսնակ Անի Բադալյանը։
Նրանից 38-ի համար, ովքեր ճամփորդելիս են եղել Qatar Airways-ի միջոցով, ավիաընկերության կողմից ապահովվել են կեցության, սնունդի բոլոր պայմանները։
«Կատարի տարածքում է գտնվում ևս 3 քաղաքացի, ում պարագայում ևս դիտարկվում են վերադարձի հնարավոր տարբերակներ։ Qatar Airways ընկերության մարտի 9-ի չվացուցակի մեջ այս պահի դրությամբ ներառված է դեպի Երևան չվերթը», - նշել է ԱԳՆ խոսնակը։
Նա նաև տեղեկացնում է, որ Վիետնամում այս պահին գտնվում է ՀՀ 12 քաղաքացի. «4-ը մարտի 7-ին կմեկնի Հոշիմին-Գուանճոու-Ալմաթի-Թբիլիսի թռիչքով, այնուհետ Թբիլիսիից մեքենաներով կվերադառնա Երևան։ 7-ը մարտի 9-ին վերադառնալու է Հայաստան Հոշիմին֊Ուրումչի֊Երևան երթուղիով, ևս մեկ քաղաքացի սպասում է Բահրեյն վերադառնալուն»:
Իսրայելը հարվածել է Իրանի «Մեհրաբադ» օդանավակայանին, հայտնում է Al Jazeera-ն:
Ռուսաստանի նախագահ Վլադիմիր Պուտինը հեռախոսազրույց է ունեցել Իրանի նախագահ Մասուդ Փեզեշքիանի հետ:
Փեզեշքիանը մանրամասն ներկայացրել է հակամարտության վերջին ակտիվ փուլի զարգացումները։
Ռուսական կողմի փոխանցմամբ՝ Պուտինը վերահաստատել է Ռուսաստանի սկզբունքային դիրքորոշումը՝ հօգուտ ռազմական գործողությունների անհապաղ դադարեցման, Իրանի շուրջ, Մերձավոր Արևելքում առաջացող ցանկացած խնդրի լուծման համար ուժի կիրառման մերժման և դիվանագիտական կարգավորման ուղուն արագ վերադարձի։
ԱՄՆ Կենտրոնական հրամանատարությունը հայտարարել է, որ Իրանի դեմ պատերազմի առաջին շաբաթվա ընթացքում Միացյալ Նահանգները հարվածել է ավելի քան 3000 թիրախի:
Ադրբեջանի պետական անվտանգության ծառայությունը պնդում է, որ կանխել է Իրանի Իսլամական հեղափոխության պահապանների կորպուսի (ԻՀՊԿ) կողմից կազմակերպված մի շարք «պլանավորված ահաբեկչական, դիվերսիոն և հետախուզական գործողություններ»։
Ըստ ադրբեջանական ԶԼՄ-ների տարածած հաղորդագրությունների՝ գործողությունների թիրախում էին Ադրբեջանի կարևորագույն ենթակառուցվածքները և բարձրաստիճան պաշտոնյաները։ Նպատակակետերի թվում էին «Բաքու-Թբիլիսի-Ջեյհան նավթատարը, Բաքվում Իսրայելի դեսպանատունը», սինագոգը և այլն:
Լիբանանում Իսրայելի կողմից «Հեզբոլա» խմբավորման դեմ իրականացված հարվածներից շուրջ 220 մարդ է զոհվել, հաղորդում են Մերձավոր Արևելքի լրատվամիջոցները՝ հղում անելով Լիբանանի առողջապահության նախարարությանը։
Գերատեսչության տվյալներով՝ հարվածների հետևանքով վիրավորների թիվը հասնում է 800-ի։
Դեռ երեկ հաղորդվում էր 102 զոհի և 638 վիրավորի մասին։
Իսրայելի Պաշտպանության բանակի և «Հեզբոլա» շարժման միջև ռազմական գործողությունները վերսկսվել են փետրվարի 28-ին՝ Իրանի դեմ ԱՄՆ-ի և Իսրայելի սկսած գործողության ֆոնին։
Իսրայելի բանակի խոսնակ Էֆի Դեֆրինը հայտարարել է, որ գիշերվա ընթացքում կործանիչ ինքնաթիռները հարվածել են Թեհրանում գտնվող Իրանի ռեժիմի գլխավոր շտաբին։
Իսրայելը հայտարարել է, որ իր 50 ռազմական ինքնաթիռներ հարվածել են Թեհրանում գտնվող Իրանի գերագույն առաջնորդ Ալի Խամենեիի ավերված համալիրի տակ գտնվող բունկերին, որը նրա սպանությունից հետո էլ շարունակում էր օգտագործվել Իրանի ղեկավարության կողմից։