Իսրայելի բանակի խոսնակ Էֆի Դեֆրինը հայտարարել է, որ գիշերվա ընթացքում կործանիչ ինքնաթիռները հարվածել են Թեհրանում գտնվող Իրանի ռեժիմի գլխավոր շտաբին։
Իսրայելը հայտարարել է, որ իր 50 ռազմական ինքնաթիռներ հարվածել են Թեհրանում գտնվող Իրանի գերագույն առաջնորդ Ալի Խամենեիի ավերված համալիրի տակ գտնվող բունկերին, որը նրա սպանությունից հետո էլ շարունակում էր օգտագործվել Իրանի ղեկավարության կողմից։
ԱՄՆ նախագահ Դոնալդ Թրամփն այսօր հայտարարել է, որ Իրանի հետ որևէ համաձայնագիր չի կնքվի «անվերապահ կապիտուլյացիայից» բացի։
«Դրանից հետո, երբ ընտրվի հզոր ու ընդունելի առաջնորդ(ներ), մենք մեր բազմաթիվ հրաշալի և շատ քաջ դաշնակիցների ու գործընկերների հետ միասին անխոնջ կաշխատենք՝ Իրանը կործանման եզրից հետ բերելու համար»,- սոցիալական ցանցում գրել է Թրամփը՝ հավելելով, որ կաշխատեն նաև Իրանի տնտեսությունը խթանելու ուղղությամբ։
Միջազգային պարալիմպիական կոմիտեն այսօր հայտարարեց, որ Իրանը չի մասնակցի Միլանո-Կորտինա 2026 թ. ձմեռային Պարալիմպիական խաղերին։
«Իրանի ազգային պարալիմպիական կոմիտեն մեզ տեղեկացրել է, որ հնարավոր չէ ապահովել անվտանգ ճանապարհ դեպի Միլանո-Կորտինա 2026, ինչի հետևանքով նրանք չեն կարող հասնել խաղերին»,- հայտարարել է Միջազգային պարալիմպիական կոմիտեն նախագահ Էնդրյու Փարսոնսը։
Հեռախոսազրույց են ունեցել Հայաստանի և Թուրքիայի արտգործնախարարները, հաղորդում է ԱԳՆ-ն:
Արարատ Միրզոյանն ու Հաքան Ֆիդանը քննարկել են Մերձավոր Արևելքում տեղի ունեցող զարգացումները՝ մտահոգություն հայտնելով իրավիճակի շարունակական սրման կապակցությամբ։
Նրանք կարևորել են տարածաշրջանում կայունության և անվտանգության հաստատումը:
Իրանում դպրոցի վրա հարձակման վերաբերյալ անհրաժեշտ է անաչառ, թափանցիկ և անկախ հետաքննություն։ Այս մասին այսօր հայտարարել է ՄԱԿ-ի մարդու իրավունքների գլխավոր քարտուղար Վոլքեր Թյուրքը՝ կոչ անելով Միացյալ Նահանգներին իր արդեն հայտարարած քննությունը հետևողական և շատ արագ իրականացնել։
«Մենք պահանջում ենք, որ դա կատարվի շատ արագ, և պետք է նաև ապահովել պատասխանատվություն և փոխհատուցում վնասներ կրողների», -ընդգծել է ՄԱԿ-ի պաշտոնյան։
Իրանի լրատվամիջոցների հաղորդմամբ՝ երկրում պատերազմի պատճառով բոլոր համալսարանները փակվել են մինչև հետագա ծանուցում։
Eslahat News-ը, հղում կատարելով Գիտությունների նախարարությանը, հաղորդում է, որ դադարեցվել են բոլոր ակադեմիական գործունեությունները։
Հաղորդագրության համաձայն՝ դադարեցվել են թե՛ առկա դասախոսությունները, թե՛ առցանց ուսուցումն ու դասընթացները։
ՄԱԿ-ի խոսնակ Ստեֆան Դյուժարիկը փոխանցել է գլխավոր քարտուղար Անտոնիո Գուտերեշի կոչը, որով վերջինս կոչ է արել ներդրումներ կատարել խաղաղության, այլ ոչ թե հակամարտությունների մեջ։
Նյու Յորքում արված Գուտերեշի հայտարարությունը ներկայացնելիս ՄԱԿ-ի պաշտոնական ներկայացուցիչը նախազգուշացրել է, որ վերջին տասնամյակներում միջուկային զենք օգտագործելու ռիսկն ամենաբարձր մակարդակի վրա է հասել։ Ընդգծել է, որ լարվածության աճը հրահրում է ռազմական ծախսերի աստղաբաշխական մակարդակի բարձրացում։
Ֆրանսիայի նախագահ Էմանյուել Մակրոնը հայտարարել է, որ իր երկիրը չի միջամտում Մերձավոր Արևելքում ընթացող հակամարտությանը, այլ միայն պաշտպանում է իր քաղաքացիներին և դաշնակիցներին։
Մակրոնը նաև հավելել է, որ Ֆրանսիան ռազմական ուժերի հավելյալ ստորաբաժանումներ է ուղարկել Մերձավոր Արևելք, այդ թվում՝ «Շառլ դը Գոլ» ավիակիր նավը, որպեսզի պաշտպանեն իրենց քաղաքացիներին և դաշնակիցներին, որոնք ենթարկվել են Իրանի կողմից իրականացված հարվածների, ինչպես նաև օգնելու նրանց «կասեցնել անօդաչու սարքերն ու հրթիռները»։
Le Figaro թերթին տված հարցազրույցում Մակրոնը նաև նշել է, որ Փարիզը ջանքեր է գործադրում փորձելու ապահովել ծովային նավագնացության անվտանգությունը։
Ադրբեջանական APA գործակալության հաղորդմամբ՝ Ադրբեջանի արտգործնախարար Ջեյհուն Բայրամովը հրահանգել է տարհանել ինչպես Թեհրանում գտնվող դեսպանատան, այնպես էլ Թավրիզում գտնվող գլխավոր հյուպատոսության աշխատակազմին։
Այդ մասին երկրի գլխավոր դիվանագետը հայտարարել է Մոլդովայի Հանրապետության փոխվարչապետ, արտաքին գործերի նախարար Միխայ Պոպշոյի հետ համատեղ մամուլի ասուլիսի ժամանակ։
Բայրամովն ընդգծել է, որ տեղի ունեցող գործընթացների ֆոնին չի կարելի մարդկանց կյանքը վտանգի տակ դնել։
Կիպրոսում գտնվող բրիտանական ռազմաբազայում օդային տագնապի ազդանշաններ են հնչել: Նախօրեին եվրոպական մի շարք պետություններ հայտարարել էին, որ ռազմածովային և այլ միջոցներ կուղարկեն կղզու պաշտպանությունն ապահովելու համար։