Եվրոպայի խորհուրդը զգուշացնում է, որ Վրաստանի երեք հիմնական ընդդիմադիր ուժերի արգելման փորձերը սպառնում են երկիրը մղել դեպի «միակուսակցական բռնապետություն»։
Այս զգուշացումը հնչում է այն բանից հետո, երբ երեկ իշխող «Վրացական երազանք» կուսակցությունը հայտարարեց, թե դատական հայց է ներկայացնում Սահմանադրական դատարան՝ «Փոփոխությունների համար կոալիցիային», նախկին նախագահ Միխեիլ Սաակաշվիլիի «Միացյալ ազգային շարժմանն» և «Հզոր Վրաստան» դաշինքին անօրինական ճանաչելու համար։ Վրաստանի խորհրդարանի խոսնակ Շալվա Պապուաշվիլին մեղադրել է նրանց «կառավարության լեգիտիմությունը բազմիցս խաթարելու և պետության սահմանադրական կարգին հակառակ գործելու» մեջ։
Եվրոպայի խորհրդի Վրաստանի հարցերով երկու զեկուցողներն այսօր կոչ են արել երկրին հետ վերցնել իր հայցը։
«Ժողովրդավարական ընդդիմության արգելքը գործնականում կհաստատի միակուսակցական բռնապետություն և անհամատեղելի կլինի Եվրոպայի խորհրդի անդամակցության հետ», - հայտարարության մեջ նշել են Էդիտե Էստրելան և Սաբինա Կուդիչը։
Սահմանադրական դատարանը, որը համարվում է իշխող կուսակցության կողմից վերահսկվող, ինը ամիս ժամանակ ունի դիմումի վերաբերյալ որոշում կայացնելու համար։
Նախկին նախագահ Սալոմե Զուրաբիշվիլին այս քայլն անվանել էր «Վրաստանի ահաբեկչության տիրապետության վերջնական քայլը»՝ պնդելով՝ դրա նպատակն է երկիրը վերածել «ռուսական ոճի ավտորիտար ռեժիմի»։
