Վրաց ֆուտբոլիստ Խվիչա Կվարացխելիան, որը Փարիզի PSG ակումբի կազմում անցած օրերին նվաճեց Չեմպիոնների լիգայի գավաթը, Վրաստանի բարձրագույն պետական պարգևի՝ Սուրբ Գեորգի Հաղթանակի շքանշանով է պարգևատրվել, այս մասին հայտարարել է երկրի վարչապետ Իրակլի Կոբախիձեն։
«Ես կցանկանայի շնորհավորել Խվիչա Կվարացխելիային Չեմպիոնների լիգայում հաղթելու կապակցությամբ: Սա ֆուտբոլի ամենաբարձր գագաթնակետն է: Իհարկե, սա մեզանից յուրաքանչյուրի համար առանձնահատուկ հպարտության աղբյուր է՝ այն հաղթանակը, որը տարավ Խվիչան: Սա մեր ամբողջ երկրի հաղթանակն է. այսպես է ընկալել յուրաքանչյուր երկրպագու նրա հաջողությունը: Մենք պետք է ոչ միայն շնորհավորենք նրան, այլև շնորհակալություն հայտնենք նրան մեր երկրին պարգևած ուրախության համար: Վստահ եմ, որ սա նրա ապագա մեծ նվաճումների միայն սկիզբն է: Մաղթում եմ նրան մեծ հաջողություններ», - հայտարարել է Կոբախիձեն:
Կվարացխելիայից բացի Վրաստանի կառավարությունը Սուրբ Գեորգի Հաղթանակի շքանշանով է պարգևատրել նաև «Միլան» ակումբի և Վրաստանի ազգային հավաքականի նախկին ֆուտբոլիստ, Թբիլիսիի քաղաքապետ Կախա Կալաձեին, և բասկետբոլիստ Զազա Պաչուլիային:
Սուրբ Գեորգի Հաղթանակի շքանշանը Վրաստանի բարձրագույն պետական պարգևն է, որի առաջին դափնեկիրը ԱՄՆ 43-րդ նախագահ Ջորջ Բուշ կրտսերն էր: Դափնեկիրների թվում են օտարերկրյա պետությունների ղեկավարներ, դիվանագետներ, քաղաքական գործիչներ, մարզիկներ և մշակութային գործիչներ, որոնք իրենց ներդրումն են ունեցել Վրաստանի հեղինակության ամրապնդման և միջազգային համագործակցության զարգացման գործում:
