Թուրքիայի իշխանությունները այսօր կոռուպցիոն մեղադրանքներով ձերբակալել են Ստամբուլի քաղաքապետարանի ևս 47 պաշտոնյաների, հաղորդում են տեղական լրատվամիջոցները։
Ձերբակալություններից առաջ՝ անցած ամիս բանտարկվել էր Ստամբուլի քաղաքապետ Էքրեմ Իմամօղլուն, ով համարվում է նախագահ Էրդողանի գլխավոր քաղաքական մրցակիցը: Նրա ձերբակալությունը հանգեցրել էր բողոքի զանգվածային ցույցերի։
Այսօր ձերբակալվածների շարքում են քաղաքապետարանի գլխավոր քարտուղարը, Իմամօղլուի աշխատակազմի ղեկավարը, ինչպես նաև նրա օգնականի տիկինը։
Այս գործով արդեն կալանքի տակ է առնվազն 150 մարդ։ Նրանք առաջադրված մեղադրանքները չեն ընդունում՝գործը համարելով շինծու քաղաքական պատվեր՝ հաջորդ տարի կայանալիք համապետական ընտրություններից առաջ։
