2500 դոլար ու 2 միլիոն դրամ կաշառք տալու և ստանալու համար դատարանի առաջ են կանգնել Լոռու մարզի Ջրաշեն գյուղի վարչական ղեկավարը, Սպիտակի դատարանի դատավորն ու նրա օգնականը: Ըստ Հակակոռուպցիոն կոմիտեի այսօր տարածած հաղորդագրության, Ջրաշենի վարչական ղեկավար Արմեն Եղիազարյանը դատավորի օգնականի միջոցով կաշառել է դատավորին «իր մատնանշած անձի օգտին բարենպաստ վճիռ կայացնելու համար»:
Դատավորի անունը չի հրապարակվել, բայց նշվել է, որ այդ բարենպաստ վճռի համար մոտ 8000 դոլարի կաշառք է պահանջել, ստացել իր օգնականի միջոցով և վճիռ կայացրել, որով Ջրաշենին պատկանող հողամասն ու շինությունները դարձել են վարչական ղեկավարի մերձավորի սեփականությունը:
Նախաքննության ընթացքում վարչական ղեկավար Արմեն Եղիազարյանն ու դատավորի օգնական Արկադի Հարությունյանը կալանավորվել էին: Այժմ արդեն ազատ են արձակվել բացակայելու արգելքով: Նաև կասեցվել է նրանց պաշտոնավարումը: Նրանց մասով նախաքննությունն արդեն ավարտվել է, գործն ուղարկվել է դատարան, իսկ կաշառք ստանալու համար մեղադրվող դատավորը դեռ շարունակում է պաշտոնավարել ու վճիռներ կայացնել, նրա գործն էլ դեռ դատարան չի հասել:
Ավելի վաղ, «Ազատությունը» պարզել էր, որ վարչական ղեկավարն ու դատավորի օգնականը, որի միջոցով կաշառքի գործը գլուխ է եկել, մտերիմ ընկերներ են։ Գյուղին պատկանող հողամասն ու շինություններն էլ հենց վարչական ղեկավարի ընտանիքին են անցել:
Արմեն Եղիազարյանը, որ «Քաղաքացիական պայմանագրի» Սպիտակի խորհրդի անդամ է, վարչական ղեկավար է նշանակվել 2021 թվականին՝ Սպիտակի խոշորացումից հետո։ 18-ի հեղափոխությունից հետո այս գյուղը երկու մասի էր բաժանվել։ Ցույցերին մասնակցում էր նաև այժմ կաշառքի համար մեղադրվող վարչական ղեկավար Արմեն Եղիազարյանի ընտանիքը։ 20 տարի գյուղը ղեկավարած Վահան Ուռուսյանին մեղադրում էին 3600 բնակիչ ունեցող գյուղը թալանելու, հողատարածքներ, շենք-շինություններ իր ընտանիքի սեփականությունը դարձնելու մեջ։
Գյուղում իշխանափոխությունից հետո այլևս դժգոհություններ չկային։ Ժամանակին գյուղի թալանի դեմ պայքարող վարչական ղեկավարն այսօր հրաժարվեց պատասխանել «Ազատության» հարցերին:
Կաշառքին օժանդակելու համար մեղադրվող դատավորի օգնականը հարևան Հարթագյուղը 34 տարի ղեկավարած նախկին գյուղապետ Անդրանիկ Հարությունյանի որդին է։ Այս գյուղում էլ հեղափոխությունից հետո քննադատությունով իշխանափոխություն եղավ։ Նախկին գյուղապետին մեղադրում էին, որ Հարթագյուղի համայնքային ունեցվածքն է թալանել։ Նրա նկատմամբ քրեական գործ էր հարուցվել։
Դատական գործերի պաշտոնական կայքից երևում է, որ նախկին գյուղապետը, լինելով աճուրդային հանձնաժողովի նախագահ, համայնքային հողատարածքը աճուրդի է հանել ու վաճառել միակ մասնակցին՝ իր որդուն՝ Արկադի Հարությունյանին, որ այժմ մեղադրվում է կաշառքի գործով՝ արդեն որպես դատավորի օգնական։
Դատաքննության ընթացքում նախկին գյուղապետը հատուցել է համայնքին պատճառած ավելի քան մեկ միլիոն դրամի վնասը։ Դատարանը նրան տուգանել է ևս 200 հազար դրամով:
