ԱՄՆ նախագահ Դոնալդ Թրամփը նախօրեին հայտարարել է Միացյալ Նահանգների առևտրային գործընկերների ճնշող մեծամասնության նկատմամբ առևտրային մաքսատուրքեր սահմանելու մասին։
Մասնավորապես՝ ԵՄ անդամ երկրների ներմուծման մաքսատուրքերը կկազմեն 20 տոկոս, իսկ չինական ապրանքների մաքսատուրքը կգերազանցի 30 տոկոսը։
«Եկել է ազատագրման օրը», - հայտարարել է Թրամփն՝ ընդգծելով, որ ավելի քան 100 երկրներից ներմուծվող ապրանքների մաքսատուրքերն ուժի մեջ կմտնեն ապրիլի 3-ին՝ կեսգիշերից։
ԱՄՆ նախագահն ասել է, որ դրանք ամերիկացիներին կազատեն գործընկերների հետ անարդար առևտրային հարաբերություններից՝ շեշտելով՝ «շատ երկրներ հսկայական շահույթներ են ստացել ամերիկյան շուկա ազատ մուտքից, սակայն միաժամանակ սահմանափակել են ամերիկյան ապրանքների մուտքն իրենց շուկաներ»։
«ԱՄՆ-ը կստանա տրիլիոն-տրիլիոն դոլարներ, որոնք կնվազեցնեն հարկերը և կկրճատեն ազգային պարտքը», - ասել է Թրամփը՝ կանխատեսելով Միացյալ Նահանգների «ոսկե դարաշրջանի» գալուստը։
Ընդգծելով, որ բորսաներում արդեն զգացվում է հայտարարության բացասական ազդեցությունը՝ CNBC բիզնես հեռուստաալիքը զգուշացնում է․ - «Շուկաները վախենում են առևտրային պատերազմի սկսվելուց»։
Ընդդիմախոսները, մինչդեռ, զգուշացնում են հնարավոր գնաճի ու առևտրային պատերազմների բացասական հետևանքների մասին։ Դոլարը 2 տոկոսով արժեզրկվել է, ինչը մեկ օրում ամերիկյան արժույթի ամենամեծ անկումն էր 2022-ի նոյեմբերից ի վեր։
