Ադրբեջանի նախագահը կրկին պնդել է խաղաղության պայմանագրի ստորագրման նախապայմանները՝ Հայաստանի Սահմանադրությունից պետք է հանել Անկախության հռչակագրի հղումը, ինչպես նաև պետք է լուծարվի ԵԱՀԿ Մինսկի խումբը։
Պաշտոնական այցով Ադրբեջանում գտնվող Գերմանիայի նախագահի հետ համատեղ ասուլիսում Ալիևն ընդգծել է, թե «գնդակը Հայաստանի դաշտում է», և եթե Հայաստանն իսկապես ցանկանում է, որ խաղաղության պայմանագիրը ստորագրվի, ապա պետք է կատարի Ադրբեջանի այդ երկու նախապայմանները։
«Այսօրվա դրությամբ խաղաղության պամանագրի տեքստը համաձայնեցված է ամբողջությամբ։ Այն բաղկացած է 17 կետից։ Ոչ մի լրացուցիչ նախապայման Ադրբեջանն առաջ չի քաշում: Մեր նախապայամանները հայտնի են Հայաստանին, մենք դրանք երկար ժամանակ է, որ առաջ ենք քաշել, սակայն մինչ օրս Հայաստանից որևէ լուրջ պատասխան չենք ստացել։ Ինչի մասին են այդ նախապայմանները: Առաջին հերթին ԵԱՀԿ Մինսկի խումբը պետք է լուծարվի: Երկրորդ հարցը վերաբերում է Հայաստանի Սահմանադրությանը: Հայաստանի Սահմանադրության մեջ կա հղում Անկախության հռչակագրին, և այն հանդիսանում է Սահմանադրության բաղկացուցիչ մաս: Իսկ այնտեղ կա դրույթ Ադրբեջանի օրինական, պատմական տարածքը Հայաստանին միացնելու մասին, ինչը հանդիսանում է տարածքային պահանջ Ադրբեջանի նկատմամբ: Այդ իսկ պատճառով, այդ դրույթի դուրսբերումը Հայաստանի Սահմանադրությունից մեր լեգիտիմ պահանջն է», - հայտարարել է Ալիևը:
Ադրբեջանի նախագահը վստահեցրել է՝ այդ երկու նախապայմանների կատարումից հետո խաղաղության պայմանագրի ստորագրման համար որևէ խոչընդոտ չի լինի: «Ինչպես ասվում է՝ գնդակը Հայաստանի դաշտում է։ Եթե Հայաստանն իսկապես ցանկանում է ստորագրել խաղաղության պայմանագիրը, ապա նա պետք է ընդունի Ադրբեջանի այդ երկու լեգիտիմ նախապայմանները», - ասել է նա:
Ադրբեջանի նախագահի առաջ առաջ քաշած հերթական նախապայմաններին զուգահեռ՝ Գերմանիայի նախագահը համատեղ ասուլիսում հույս է հայտնել, որ խաղաղության պայմանագիրն ի վերջո կստորագրվի, պարզապես քաղաքական կամք է անհրաժեշտ՝ փոխիջումների միջոցով դրան հասնելու համար:
«Հայաստանի և Ադրբեջանի միջև խաղաղության պայմանագիրը մեծ նշանակություն ունի: Անցած մեկ տարում մեծ քայլեր են արվել: Մարտի 13-ին հայտարարվեց խաղաղության պայմանագրի տեքստի համաձայնեցման մասին: Եկել է ստորագրման հիանալի պահը: Հավատում եմ, որ խաղաղության պայմանագիրը կստորագրվի: Մենք չպետք է բաղ թողնենք այս պահը: Փոխզիջումների համար մեզ պետք է քաղաքական կամք, որպեսզի գնանք մինչև վերջ», - հայտարարել է Ֆրանկ-Վալտեր Շտայնմայերը:
Խոսելով Լեռնային Ղարաբաղի մասին՝ Ադրբեջանի նախագահն ասել է, թե «այսպես կոչված Լեռնային Ղարաբաղի հանրապետության ձևակերպումը, որը մինչև 2024 թվականի հունվար ամիսը Հայաստանը փորձում էր ներառել խաղաղության պայմանագրում, գոյություն չունի»: «Այն գոյություն ուներ միայն Հայաստանի երազանքներում: Կա Ադրբեջանի Ղարաբաղի շրջան», - եզրափակել է Ալիևը:
«Մենք գիտենք և ճանաչում ենք Ղարաբաղը որպես Ադրբեջանի տարածք». Շտայնմայերը Բաքվում վերանայել է Արցախի մասին իր մոտեցումը
Ի դեպ, պաշտոնական այցով Երևանից Բաքու ժամանած Գերմանիայի նախագահը վերանայել է Արցախի մասին իր մոտեցումը: Ֆրանկ-Վալտեր Շտայնմայերը, որ Instagram-ի իր պաշտոնական էջում երկու օր առաջ հրապարակել էր Արցախի դրոշի լուսանկարը և գրել, որ այնտեղ մեծամասամբ հայեր են ապրում, արդեն այսօր Բաքվում արցախահայերի մասին ոչինչ չի հիշատակել: Ադրբեջանի նախագահ Իլհամ Ալիևի հետ համատեղ ասուլիսում Գերմանիայի նախագահը հայտարարել է. - «Մենք գիտենք և ճանաչում ենք Ղարաբաղը որպես Ադրբեջանի տարածք»:
Արցախի դրոշի լուսանկարով Շտայնմայերի ինստագրամյան հրապարակումն այցի նախօրեին դիվանագիտական սկանդալի էր վերածվել Բեռլինի և Բաքվի միջև: Ադրբեջանի արտգործնախարարությունը բողոքի նոտա էր հղել գերմանական կողմին՝ պահանջելով ներողություն խնդրել: Ի պատասխան, Գերմանիայի պետքարտուղարը կատարել էր այդ պահանջը՝ վստահեցնելով, թե տեղի ունեցածը «տեխնիկական սխալ է»:
