Եվրամիությունն այս շաբաթ իր քաղաքացիներին խորհուրդ տվեց առնվազն 72 ժամվա սննդամթերքի պաշար հավաքել արտակարգ իրավիճակների համար։ Եվրոպական հանձնաժողովն իր ռազմավարության մեջ նշել է, որ միությունը նախապատրաստվում է տարբեր ռիսկերի, ներառյալ՝ բնական աղետներին, կիբերհարձակումներին, աշխարհաքաղաքական ճգնաժամերին, ինչպես նաև Եվրամիության երկրների նկատմամբ զինված ագրեսիային։
Իսկ պատրա՞ստ են եվրոպացիները անկանխատեսելի այդ սցենարներին:
«Մենք երբեք նման իրավիճակում չենք եղել, իհարկե, մեզ անհրաժեշտ է պատրաստվել, հուսով եմ՝ Եվրամիությունը ցույց կտա ճանապարհը», - ասաց բնակիչներից մեկը։
«Կարծում եմ՝ Գերմանիայում երեք օրվա համար բավականաչափ սնունդ ու ջուր կունենամ, կարծում եմ՝ աղետների դեպքում տանը պետք է անհրաժեշտ պաշար ունենալ։ Պատրաստվելը լավ գաղափար է», - նշեց մեկ այլ բնակիչ։
Հարց. - Կարծում եք, որ սա հիմա ավելի անհրաժեշտ է, քան նախկինո՞ւմ:
«Այո, հաշվի առնելով աշխարհաքաղաքական իրավիճակը, ահաբեկչության, պատերազմի փաստը, այո, պատրաստվելը կարող է օգտակար լինել»
Հարց. Կհետևե՞ք այդ խորհրդին, եթե առաջիկա օրերին լսեք նման հայտարարություն:
«Եթե դրա համար բավարար պատճառ լինի, իհարկե, քանի որ մենք պատասխանատու մարդիկ ենք»:
Հարց. - Ի՞նչ կգնեիք պաշար հավաքելու համար։
«Ջուր, սնունդ, բրինձ, այնպիսի սննդամթերք, որ կարելի է երկար պահել, օրինակ՝ պահածոներ»։
Եվրոպական հանձնաժողովի ճգնաժամային կառավարման և պատրաստվածության հարցերով հանձնակատար Հաջա Լահբիբը նշել է, որ Եվրամիության ողջ տարածքում մտահոգությունները տարբեր են,բայց բոլոր քաղաքացիները պետք է ջանք գործադրեն՝ արտակարգ իրավիճակների պատրաստ լինելու համար: «Պատրաստ լինել ամեն ինչին, սա պետք է լինել մեր նոր եվրոպական կենսակերպը»,-ասել է պաշտոնյան։
Սոցիալական ցանցում հրապարակած տեսանյութում ճգնաժամային կառավարման հարցերով հանձնակատարը թվարկում է անհրաժեշտ իրերը, որոնք պետք են արտակարգ իրավիճակում 72 ժամ գոյատևելու համար։ 3 Օրվա պաշարը ներառում է սնունդ, ջուր, փաստաթղթեր, մարտկոց, լապտեր, կանխիկ գումար, դեղորայք։
Ավելի մանրամասն՝ «Ազատության» ռեպորտաժում.
