Ադրբեջանի նախագահը կրկին հայ ժողովրդին որակել է թշնամի ու պնդել, թե հայկական ֆաշիզմի նմանն աշխարհը չի տեսել։
«Նրանք մեզ ցեղասպանության են ենթարկել», - այսօր հայտարարել է Իլհամ Ալիևը՝ կնոջ հետ այցելելով Աղդամում վերականգնված գյուղեր։
«Աղդամն ու շրջանի բոլոր գյուղերն ամբողջությամբ ավերվել էին ատելի թշնամու կողմից, ոչ մի շինություն կանգուն չէր մնացել։ Սա ևս մեկ անգամ ցույց է տալիս թշնամու էությունը, նրա բացարձակ անհիմն թշնամությունը մեր հանդեպ», - ասել է Ալիևը՝ Աղդամը որակելով որպես «Կովկասի Հիրոսիմա»։
Խոսելով ղարաբաղյան երկրորդ պատերազմի մասին՝ Իլհամ Ալիևը պնդել է, թե երբ սկսել են շարժվել Աղդամի ուղղությամբ, «թշնամու զորքը հայտնվել է շրջափակման մեջ»։
«Ադրբեջանը ևս մեկ անգամ մարդասիրություն ի ցույց դրեց՝ թշնամուն հնարավորություն տալով ինքնակամ լքել մեր հողերը։ Ադրբեջանի պետությունը հումանիզմ դրսևորեց այն տարրերի հանդեպ, որոնք դրան արժանի չեն», - ասել է Իլհամ Ալիևը՝ դիմելով Աղդամի վերաբնակիչներին։
Մոտ 15 րոպե շարունակված ելույթի, ադրբեջանցիների հետ հարցուպատասխանի ընթացքում նա որևէ բառ չի ասել Հայաստանի հետ խաղաղության պայմանագրի կամ դրա ստորագրման հնարավորության մասին։
Հայաստանի իշխանությունները երկրորդ շաբաթն է՝ փաստաթղթի տեքստի համաձայնեցումից հետո առաջարկում են Բաքվին բանակցություններ սկսել դրա ստորագրման վայրի, ժամկետի ու վավերացման վերաբերյալ։ Ադրբեջանից հակադարձում են, թե Երևանը պետք է մինչ այդ նաև Սահմանադրությունը փոխի, ինչպես նաև լուծարի ղարաբաղյան խնդրով զբաղվող ԵԱՀԿ Մինսկի խումբը։
