Հակակոռուպցիոն կոմիտեի նախագահի թեկնածուների նախօրեին մեկնարկած մրցույթում Արթուր Նահապետյանը, Պետրոս Մարտիրոսյանը և Գևորգ Քոչարյանը հաղթահարել են շեմը ու ներկայացվել Կառավարության քննարկմանը։ Առավելագույն միավորներ հավաքած թեկնածուներից մեկին Կառավարությունը կնշանակի Հակակոռուպցիոն կոմիտեի ղեկավար:
Կոռուպցիոն հանցագործությունները քննող կառույցի ղեկավարի թափուր պաշտոնի համար հինգ թեկնածու էին պայքարում։ Թեկնածուներից սահմանված շեմը չեն հաղթահարել Կարեն Բատիկյանը և Արտաշես Մայիլյանը։ Բատիկյանը փաստաբան է: Մինչ այդ երկար տարիներ աշխատել է քննիչ ու դատախազ, իսկ Մաիլյանը Հակակոռուպցիոն կոմիտեի քննչական երրորդ վարչության ՀԿԳ ավագ քննիչ է։
Մրցույթի անցողիկ շեմը հաղթահարած Արթուր Նահապետյանը Քննչական կոմիտեի նախագահի տեղակալն է։ Նա այս պաշտոնին նշանակվել է ընդամենը մեկ ամիս առաջ: Մինչ այդ Վերաքննիչ հակակոռուպցիոն դատարանի դատավոր է եղել:
Պետրոս Մարտիրոսյանը, վարչապետի աշխատակազմից է, ղեկավարում է տեսչական մարմինների համակարգման գրասենյակը: Մինչ այդ դատախազ է աշխատել:
Գևորգ Քոչարյանը Գլխավոր դատախազության ապօրինի ծագում ունեցող գույքի բռնագանձման գործերով ավագ դատախազ է։
Հակակոռուպցիոն կոմիտեի նախագահի պաշտոնը թափուր է անցած նոյեմբերից, երբ վարչապետ Փաշինյանը SMS-ով հորդորեց կոմիտեի ղեկավար Սասուն Խաչատրյանին հրաժարական տալ:
