Պաշտոնական Քիշնևն արգելեց Մոլդովայում գործող ռուսաստանյան կրթամշակութային կենտրոնի՝ «Ռուսական տան» գործունեությունը:
Մոլդովայի դիվանագիտական գերատեսչությունը հայտնում է, որ նման քայլով Քիշնևը պատասխանում է ռուսական գրոհային անօդաչու թռչող սարքերով երկրի օդային տարածքը խախտելուն։
Մոլդովայի նախագահ Մայա Սանդուն անցած օրերին հայտարարել էր, որ Ուկրաինայի Օդեսայի մարզի վրա ռուսական դրոնների հարձակման ժամանակ դրանցից երկուսը ներխուժել է Մոլդովայի տարածք ու պայթել։ Պայթյունի հետևանքով զոհեր և վիրավորներ չեն եղել:
Մոլդովայի ԱԳ նախարարության որոշմանն ի պատասխան՝ ՌԴ դեսպանությունից ասել են, որ «ակնհայտ է, որ պաշտոնական Քիշնևը շարունակում է բարձրացնել լարվածության մակարդակը և ոչնչացնել ավանդական կապերը»:
Ռուս-ադրբեջանական լարվածության ֆոնին անցած օրերին էլ Ադրբեջանի կառավարությունն արգելափակեց Բաքվում «Ռուսական տան» գործունեությունը։
