«Վերջին օրերդ ես ապրում քո քաղաքական կյանքի, շատ լավ հիշիր, Նիկոլ Փաշինյան։ Էս ապօրինություններդ, հակաօրինական կյանքդ որպես քաղաքական կյանք վերջ է գտնելու, ու ամենայն պատասխանատվության առաջ ես կանգնելու՝ բոլոր առումներով». - այսօր հայտարարեց Բագրատ արքեպիսկոպոս Գալստանյանը:
Տավուշի թեմի առաջնորդը վաղվա հանրահավաքին ընդառաջ բարձրաձայնում է շարժման աջակիցների նկատմամբ իրականացվող հալածանքների և ճնշումների մասին։ Արքեպիսկոպոսի խոսքով՝ Նիկոլ Փաշինյանը վախեցած է և այդ վախի պատճառով սկսել է հետապնդել նաև արցախցի պաշտոնյաներին։ Երկու ամսով տնային կալանքի տակ է Ասկերանի քաղաքապետը, ձերբակալվել է Մարտակերտի քաղաքապետը, Ստեփանակերտի քաղաքապետի տունն էլ խուզարկել են։
«Վախերն են, մարդը վախեցած է և դեռ շատ ավելի է վախենալու, ես պարզապես մտածում եմ, որ վախի՛ց բան չպատահի։ Շատ հստակ ասում եմ՝ սա միայն վախերի դրսևորումն է, որ արտահայտվում է այս կերպով: Հալածում են մարդկանց, ռեպրեսիաների են ենթարկում այս օրերին, որպեսզի պատրանք ստեղծեն, որ ամսի 26-ին՝ վաղը այսինքն, մարդիկ չգան հանրահավաքի», - հայտարարեց Բագրատ սրբազանը:
Վարչապետ Փաշինյանի հրաժարականը պահանջող արքեպիսկոպոսի խոսքով՝ իշխանությունը նաև հետապնդում է գործարարներին, ովքեր կանգնած են իր կողքին. - «Նաև գործարարներին են հալածում, այսօր շատ պատվական մարդու, որ տարիներով ծառայել է մեր պետությանը, իրենց գործարանն են մտել, հարկային խուզարկումներ և ձերբակալել են: Հայկ Շահնազարյանն է, Շահնազարյան գինու-կոնյակի գործարանը, որ բացեիբաց մեր աջակիցներն են, այսինքն՝ ոչ թե մեր, այլ՝ ճշմարտության: Ինձ հետ է եղել միշտ, ինձ հետ է եղել միշտ, միշտ, անթաքույց»:
Տավուշի թեմի առաջնորդը նաև ահազանգում է՝ հալածանքներից բացի, իրենց նաև տեղեկություններ են հասել իշխանության կողմից խմբեր ձևավորելու մասին։ «Աստված չանի այդ լուրերը ճշտվեն, ըստ լուրերի՝ խմբեր են կազմում՝ 15-17-հոգանոց, իշխանությունները, նաև, ըստ լուրերի, հայտնի օլիգարխի գլխավորությամբ՝ էն որ սպառնում էր՝ ունեզրկելու, մահացնելու, սպանելու: Եթե չկան, թող հերքեն այդ լուրերը: Նույնիսկ մարտական տրամադրությամբ խմբեր են կազմում՝ ինչ-որ Աշոտ Մկրտչյանի գլխավորությամբ: Եթե էդ լուրերը ճիշտ են, ամենայն պատասխանատվությամբ ասում եմ՝ ամենածայրաստիճանի պատասխան են ստանալու», - վստահեցրեց Տավուշի թեմի առաջնորդը:
Ո՞ւմ նկատի ունի սրբազանը, երբ ասում է, թե ըստ իրենց հասած տեղեկությունների՝ խմբերը ձևավորվում են հայտնի օլիգարխի գլխավորությամբ: «Խաչատուր Սուքիասյանը, ո՞վ, էլ ո՞վ կա: Չեմ կարող հաստատել, բայց, այդուհանդերձ, եկել են մեզ լուրերը, և ուղղակիորեն ասում եմ, իրավապահների ուշադրությունն եմ հրավիրում, որովհետև բոլոր տեսակի սադրանքներ հնարավոր են այս մարդկանց ձեռքից», - հարցին արձագանքեց Բագրատ արքեպիսկոպոսը:
Ազգային ժողովի իշխող «Քաղաքացիական պայմանագիր» խմբակցության պատգամավոր Խաչատուր Սուքիասյանի մամուլի խոսնակ Աննա Մկրտչյանն «Ազատությանը» փոխանցեց՝ «զառանցանքները և անհեթեթությունները մեկնաբանելու իմաստ չենք տեսնում»:
Սուքիասյանն օրերս խորհրդարանի ամբիոնից ունեզրկմամբ ու մահով էր սպառնացել քաղաքական ընդդիմախոսներին, ապա խմբագրել էր հայտարարությունը՝ պնդելով, թե ընդամենը սթափության կոչ է արել։
Տավուշի թեմի առաջնորդին արձագանքեցին նաև Ներքին գործերի նախարարությունից՝ «Ազատությանը» փոխանցելով, որ «ստեղծված ապօրինի ջոկատների» մասին տեղեկություն չեն ստացել։ «Եթե քաղաքացիները ունեն նման տեղեկություններ, կարող են դիմել Ոստիկանություն: [...] Նման ապօրինի ստորաբաժանումներ ստեղծելու ցանկացած փորձ անգամ իրավապահ համակարգի կողմից, օրենքի սահմաններում կարժանանա ամենախիստ արձագանքի», - «Ազատությանն» ասաց ՆԳՆ խոսնակ Նարեկ Սարգսյանը։
Իսկ իշխող ուժի փոխնախագահ Վահագն Ալեքսանյանն էլ, իր հերթին, արդեն սուտ մատնության հատկանիշներով Դատախազություն հաղորդում է ներկայացրել։
Բագրատ սրբազանն այսօր մասնակցում էր ՀՅ Դաշնակցության Հայ դատի հանձնախմբերի ու գրասենյակների համահայկական խորհրդաժողովին։ Դաշնակցությունը, որ սատարում է արքեպիսկոպոսի առաջնորդած շարժմանը, վաղվա հանրահավաքին ընդառաջ վերահաստատում է՝ կողմ են վարչապետի ապակուսակցական թեկնածուի առաջադրմանը։
«Այս իրավիճակում նման համախմբում իրականացնելու համար դա անհրաժեշտություն է: Դա պետք է չլինի մեկ ուժի կառավարություն, դա պետք է լինի ազգային համաձայնության, հաշտության կառավարություն», - «Ազատությանը» ասաց ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը՝ հարցին, թե դիտարկում են Բագրատ սրբազանի՞ թեկնածությունը, պատասխանելով. - «Մենք մեր տեսակետը շատ հստակ հայտարարել ենք հենց առաջին օրվանից՝ եթե Բագրատ սրբազանը որոշում կայացնի առաջադրվելու, մենք անվերապահորեն աջակցելու ենք այդ որոշմանը, և մեր ողջ ջանքերը դնելու ենք... Վաղը լրացուցիչ կխոսենք այդ արգելքը հաղթահարելու [մասին]»։
Բագրատ սրբազանն այսօր հաստատեց՝ վաղը հանրահավաքում կհնչի վարչապետի իրենց թեկնածուի անունը։ Ո՞վ է այդ թեկնածուն.
«Ազատություն». - Կարող ե՞նք ասել, որ Դուք եք լինելու:
Բագրատ սրբազան. - Չէ, չգիտենք ով է լինելու: Կերևա: Ոնց որ յոթ ամսական լինեք, ժողովուրդ, վեց ավելի ճիշտ:
Դաշնակցության խորհրդաժողովին մասնակցում են նաև նախկին արտգործնախարարներ Վարդան Օսկանյանը, Արա Այվազյանը, Հայաստանի Ազգային ժողովի «Հայաստան» և «Պատիվ ունեմ» խմբակցությունների ղեկավարներ Սեյրան Օհանյանը և Հայկ Մամիջանյանը, Արցախի Ազգային ժողովի փոխնախագահ Գագիկ Բաղունցը:
