ՆԱՏՕ-ի երկրների միջուկային օբյեկտները Լեհաստանում մշտապես տեղակայվելու պարագայում Ռուսաստանի համար ռազմական թիրախ կդառնան, ՏԱՍՍ-ին ասել է ՌԴ փոխարտգործնախարար Սերգեյ Ռյաբկովը՝շեշտելով՝ «ՆԱՏՕ-ի համատեղ միջուկային առաքելությունների պրակտիկայի ընդլայնումը կրում է զուտ ապակայունացնող բնույթ»:
«Ուստի բոլոր այն քաղաքական գործիչները, ովքեր հիմա ոգևորությամբ քննարկում են նման սխեմա Լեհաստանում և արտերկրում, պետք է հասկանան, որ այս ուղղությամբ տեղաշարժերը Լեհաստանի անվտանգությունը չեն բարձրացնելու, իսկ մեր ռազմական պլանավորման մեջ դրանք կլինեն թիրախում», - ասել է Ռյաբկովը։
Ավելի վաղ Լեհաստանի նախագահ Անջեյ Դուդան Fakt-ին տված հարցազրույցում հայտարարել էր, որ Լեհաստանի իշխանությունները բազմիցս Միացյալ Նահանգների հետ քննարկել են ՆԱՏՕ-ի միջուկային փոխանակման ծրագրի շրջանակներում հանրապետությունում միջուկային զենք տեղակայելու հնարավորությունը և անհրաժեշտության դեպքում նման պատրաստակամություն հայտնել։
