Ուկրաինա Ռուսաստանի ռազմական ներխուժման երկրորդ տարելիցի կապակցությամբ Կիև են ժամանել Արևմտյան առաջնորդները՝ Եվրահանձնաժողովի նախագահ Ուրսուլա ֆոն դեր Լայենը, Իտալիայի վարչապետ Ջորջիա Մելոնին, Բելգիայի վարչապետ Ալեքսանդր Դե Կրուն, Կանադայի վարչապետ Ջասթին Թրյուդոն։
Արևմտյան առաջնորդների այցին նախորդել է ռուսական ուժերի օդային հարձակումները, որոնց հետևանքով Օդեսայում առնվազն մեկ մարդ է զոհվել, կան նաև վիրավորներ։ Օդեսայի նահանգապետ Օլեգ Կիպերի խոսքով՝ փրկարարները շարունակում են փլատակների մաքրման աշխատանքները՝ ողջ մնացածներին դուրս բերելու նպատակով:
Ռուսական կողմն, իր հերթին, հաղորդում է ուկրաինական ուժերի հարվածների մասին։ Հաղորդվում է, որ անօդաչու թռչող սարքերը հարվածել են Ռուսաստանի հարավում գտնվող Լիպեցկի շրջանի պողպատի գործարանին, ինչի հետևանքով խոշոր հրդեհ է բռնկվել։ Ըստ Լիպեցկի նահանգապետ Իգոր Արտամոնովի՝ տուժածներ չկան։
Mediazona ռուսաստանյան անկախ պարբերականի տվյալներով՝ 2022 և 2023 թվականներին ռուս-ուկրաինական պատերազմում զոհվել է մոտ 75 հազար ռուսաստանցի զինվոր։ Լրատվամիջոցը նշում է, որ Ուկրաինայում Ռուսաստանի կորուստների տեմպերը չեն դանդաղում, և որ Մոսկվան օրական կորցնում է մոտ 120 զինծառայող:
