Յուլիա Նավալնայան հանդես է եկել ուղերձով՝ հայտարարելով, որ մտադիր է ամուսնու գործը շարունակել :
«Իմ փոխարեն մեկ այլ անձ պետք է լիներ։ Բայց Վլադիմիր Պուտինը սպանել է այդ անձին», - սոցիալական ցանցերում հրապարակած ուղերձում հայտարարել է ռուս ընդդիմադիր առաջնորդի կինը։
Նավալնայան խոստացել է ամուսնու հետ կատարվածի պատճառների մասին խոսել առաջիկայում:
«Ես կշարունակեմ Նավալնիի գործը, կշարունակեմ պայքարել մեր երկրի համար», - ընդգծել է քաղաքական գործչի կինը՝ կոչ անելով իր կողմնակիցներին շարունակել պայքարը պատերազմի, կոռուպցիայի և անարդարության դեմ։
«Ես չեմ վախենում, դուք էլ ոչ մի բանից մի վախեցեք», - ասել է Կրեմլի կոշտ քննադատի կինը :
Ռուսաստանի քրեակատարողական դաշնային ծառայության տվյալներով՝ Ալեքսեյ Նավալնին մահացել է փետրվարի 16-ի կեսօրին՝ զբոսանքից հետո։ Նրա դին մինչ այս պահը չի հանձնվել հարազատներին։ Քննչական կոմիտեն հայտնել է, որ «Նավալնիի մահվան հետաքննությունը երկարաձգվել է։ Թե որքան կտևի՝ հայտնի չէ։ Մահվան պատճառը դեռևս պարզված չէ»։
