Այսօր Հայաստան վերադարձած 32 գերիները Իջևանից տեղափոխվել են Երևան՝ «Մուրացան» զինվորական հոսպիտալ: Տեղում նրանք նախնական բուժզննում են անցնում: Վերադարձած գերիների ծնողներն ու հարազատները հավաքվել են հոսպիտալի դիմաց:
Ծնողներից շատերը «Ազատությանը» հայտնեցին, որ մինչև վերջին րոպեն հստակ չեն իմացել՝ արդյոք իրենց տղան վերադարձողների ցանկում է, թե՝ ոչ:
Հայաստան վերադարձված գերիների մեծ մասը Խծաբերդից գերեվարված շիրակցի պահեստազորայիններն են:
Երևանի ու Բաքվի համատեղ հայտարարությունից վեց օր անց 32 հայ գերիներն արդեն Հայաստանում են։ Ադրբեջանական կողմը նրանց այսօր վերադարձրեց հայ-ադրբեջանական սահմանի Իջևանի հատվածում։ Հայկական կողմն էլ իր հերթին Ադրբեջանին հանձնեց Զանգեզուրի պղնձամոլիբդենային կոմբինատի պահակի սպանության համար ցմահ ազատազրկված Հուսեյն Ախունդովին ու 11 տարով ազատազրկված Ագշին Բաբիրովին։
