«Ռուսաստանը շանս ունի ցույց տալու, որ ինքն, այնուամենայնիվ, հավատարիմ է ստորագրված փաստաթղթերին», - անդրադառնալով Մոսկվայից 400 միլիոն դոլարի դիմաց զենքի՝ այդպես էլ ավարտին չհասած գործարքին, այսօր հայտարարեց Հայաստանի Ազգային ժողովի նախագահը:
Ալեն Սիմոնյանը կիսում է պաշտոնական Մոսկվայից երեկ հնչած դիրքորոշումը, թե հարցը հնարավոր է լուծել գործընկերային մթնոլորտում:
Նախօրեին Ռուսաստանի արտաքին գործերի նախարարության մամուլի քարտուղարն էր ողջունել զենքի հարցը գործընկերային մթնոլորտում լուծելու Հայաստանի ցանկությունը: Իսկ նման ցանկության մասին օրերս խոսել էր Հայաստանի պաշտպանության փոխնախարար Հրաչյա Սարգսյանը:
«Եթե պարտավորությունները չեն կատարվում, իսկ դա փաստ է, որ չեն կատարվում, Հայաստանի Հանրապետությունը պետք է պաշտպանի իր շահերը», - ասաց Սիմոնյանը:
Մոտ երկու շաբաթ հետո Մոսկվայում սպասվում է Հավաքական անվտանգության պայմանագրի կազմակերպության Խորհրդարանական վեհաժողովի (ՀԱՊԿ ԽՎ) խորհրդի նիստը, որին Ալեն Սիմոնյանը չի մասնակցի, ասաց՝ այդ նիստերին մասնակցելու իմաստ չի տեսնում, քանի որ Մոսկվան չի կատարում իր պարտավորությունները:
Անդրադառնալով հարցին՝ Երևանը քննարկո՞ւմ է արդյոք մոսկովյան հարթակում բանակցությունների անցկացման առաջարկը, Սիմոնյանը նշեց՝ հայկական կողմի համար տարբերություն չկա, թե բանակցությունները որ հարթակում կլինեն, կարևորը՝ գործող հարթակ լինի: Իսկ Ադրբեջանը, ըստ Սիմոնյանի, խուսափում է միջազգային հարթակներից:
«Ինչո՞ւ միջազգային հարթակներ չի գալիս՝ որովհետև, կարծում եմ, որ այն էթնիկ զտումը, որն իրականացվեց, այն գործելաոճը, աշխատելաոճը, որը տեսան միջազգային գործընկերները, բավականին բարդ կացության մեջ է դրել Ադրբեջանին, դա փաստ է: Փաստ է, որ որպես գործընկեր միջազգային առումով Ադրբեջանը, իմ գնահատմամբ, բավականին սխալ ու վատ է իրեն պահել», - ընդգծեց ԱԺ նախագահը:
