Ռուսաստանի պաշտպանության նախարարության պատվիրակությունն ուրբաթ կայցելի Երևան՝ քննարկելու Լեռնային Ղարաբաղից ռուսական խաղաղապահ զորախմբի դուրսբերման ժամկետները, հայտնում է ՏԱՍՍ գործակալությունը՝ վկայակոչելով իր դիվանագիտական աղբյուրը։
«Այսօր Երևան կայցելի ՌԴ պաշտպանության նախարարության պատվիրակությունը, հայկական կողմի հետ հանդիպմանը կքննարկվեն Լեռնային Ղարաբաղից ռուսական խաղաղապահ զորախմբի դուրսբերման հստակ ժամկետներ»,- աղբյուրի խոսքերն է մեջբերում ՏԱՍՍ-ը։
Պաշտոնական Երևանը, սակայն, հայտարարում է ՌԴ ՊՆ պատվիրակության այցի վերաբերյալ տեղեկություններ չունի։
ՊՆ խոսնակ Արամ Թորոսյանն «Ազատությանը» փոխանցեց, որ նման հանդիպում Հայաստանի պաշտպանության նախարարությունում պլանավորված չէ։
«ՀՀ ՊՆ-ն ՌԴ ՊՆ պատվիրակության այցի վերաբերյալ, ինչի մասին քիչ առաջ մամուլը գրեց, որևէ տեղեկություն չունենք և նման հանդիպում ՀՀ ՊՆ-ում պլանավորված չէ», - «Ազատությանն» ասաց Թորոսյանը։
Լեռնային Ղարաբաղում ռուսական խաղաղապահ զորախումբը հինգ տարի ժամկետով տեղակայվել է 2020 թվականի նոյեմբերի 9-ին Ադրբեջանի, Հայաստանի և Ռուսաստանի ղեկավարների կողմից ստորագրված հայտարարության համաձայն։ Սակայն սեպտեմբերի 19-ի ռազմական գործողություններից հետո, երբ ստորագրվեց հունվարի 1-ի Արցախի հանրապետությունը կազմալուծելու մասին հրամանագիրը, ապա ավելի քան100 հազար մարդ լքեց Արցախը, Կրեմլից հայտարարեցին՝ պարզ չէ՝ առաջիկայում ինչ ճակատագիր է սպասվում խաղաղապահներին։
Պուտինի խոսնակը միայն մեկ բան է հստակեցրել՝ ապագա պայմանագիրը պետք է կնքվի Ադրբեջանի և Ռուսաստանի միջև։
«Դեռևս դժվար է խոսել, թե ինչ կլինի հետո Լեռնային Ղարաբաղում ռուսական խաղաղապահ առաքելության հետ, քանի որ խոսքը Ադրբեջանի տարածքում գործողությունների մասին է։ Մենք սա քննարկելու ենք Բաքվի հետ», - նշել է Պոսկովը:
Երեկ ՌԴ ՊՆ-ն հայտնեց, որ ռուսական զորախումբն «ավարտվել է Ասկերանի, Մարտակերտի և Շուշիի շրջանների նախկին շփման գծի երկայնքով ժամանակավոր դիտակետերի ապամոնտաժումը»։
