Հայաստանի հատուկ հանձնարարություններով դեսպան Էդմոն Մարուքյանը հերքում է ադրբեջանական կողմի մի շարք պնդումներ։
Ռուսական ՏԱՍՍ-ի հետ զրույցում Մարուքյանը բացարձակ իրականությանը չհամապատասխանող է որակել Ադրբեջանի նախագահի օգնական Հիքմեթ Հաջիևի հայտարարությունը, թե Բաքուն անհանգստացած է «սահմանին և Ղարաբաղում հայկական զինված ուժերի ռազմական սադրանքներով»։
«Այս բողոքի տակ թաքնված են բոլոր այն գործողությունները, որոնք վերջին շրջանում կատարել է ինքը՝ Ադրբեջանը», - ասել է դեսպանը՝ հիշեցնելով՝ մեկ տարի առաջ Ադրբեջանը լայնածավալ ագրեսիա սկսեց Հայաստանի Հանրապետության դեմ, հայկական կողմը 200-ից ավելի զոհ ունեցավ, վիրավորներ, նոր ռազմագերիներ։
«Այս ամենը տեղի է ունեցել խաղաղ բանակցությունների գործընթացում, որը ոչ մի հիմնավորում կամ արդարացում չունի, դա չհրահրված ագրեսիա էր», - նկատել է նա։
Ադրբեջանը փորձում է մոռանալ այս հանգամանքը, թեև օկուպացրել է Հայաստանի մոտ 150 քառակուսի կիլոմետր տարածքը, չի հետևում Հայաստանի և միջազգային հանրության պահանջներին և իր զորքերը դուրս չի բերում ՀՀ ինքնիշխան տարածքից, շեշտել է Էդմոն Մարուքյանը։
«Ադրբեջանը պետք է դուրս բերի իր զորքերը և ազատ արձակի բոլոր ռազմագերիներին և այլ կալանավորներին, ինչը Բաքվի ստանձնած պարտավորությունն է», - հայտարարել է հատուկ հանձնարարություններով դեսպանը։
Բաքվից շարունակ պնդում են, որ Երևանը «տորպեդահարում է խաղաղ բանակցությունները», իսկ «հայկական անօրինական կազմավորումները զանգվածային ականապատում են իրականացնում Ադրբեջանի տարածքում»։ Էդմոն Մարուքյանը սա ևս սուտ է որակել, ընդգծել, որ հայկական կողմերը Ադրբեջանին են հանձնել ականապատ դաշտերի քարտեզները՝ որպես վստահության քայլ։
«Ի պատասխան՝ Ադրբեջանը շարունակում է ռազմագերիների առևանգել Լաչինի միջանցքից և ՀՀ ինքնիշխան տարածքից, շարունակաբար կրակոցներ է արձակում, օգտագործում դիպուկահարներ, սադրանքներ և դիվերսիաներ իրականացնում Լեռնային Ղարաբաղում։ Այսպիսով, Ադրբեջանը շարունակում է վստահության մակարդակի խնդիր ստեղծել՝ խոչընդոտելով նաև Ստեփանակերտի և Բաքվի միջև երկխոսությանը», - պնդել է նա։
Հայաստանի վարչապետը, Մարուքյանի խոսքով, ձեռնարկել է հնարավոր և անհնարին բոլոր քայլերը՝ խաղաղության գործընթացի նկատմամբ վստահության մակարդակը բարձրացնելու համար, իսկ Բաքվի մշտական գործողությունները հակառակը՝ տորպեդահարում են այդ գործընթացը։
