Ապօրինի զենք-զինամթերք ձեռք բերելու, պահելու և իրացնելու կասկածանքով ձերբակալված «Սպուտնիկ Արմենիա»-ի լրագրող Աշոտ Գևորգյանը, ռուսամետ բլոգեր Միկա Բադալյանը և ևս մեկ անձ ազատ են արձակվել, «Ազատությանը» փոխանցեց Քննչական կոմիտեի խոսնակ Գոռ Աբրահամյանը:
Ըստ Աբրահամյանի՝ զենք-զինամթերք ձեռք բերելու, պահելու և իրացնելու համար մեղադրանք է առաջադրվել 4 հոգու, միջնորդություն է ներկայացվել դատարան՝ վերջիններիս նկատմամբ որպես խափանման միջոց կալանավորում կիրառելու վերաբերյալ:
Քննչական կոմիտեն հայտնում է, որ տվյալներ են ձեռք բերվել՝ Վերիշենի բնակիչ, 32-ամյա Մ.Պ.-ի կողմից հանցանքի կատարումը վկայող փաստեր այն մասին, որ նա ապօրինի կերպով փոխադրել, պահել և, մի խումբ անձանց հետ նախնական համաձայնությամբ, ապօրինի իրացրել է հրազեն և ռազմամթերք, որոնք հայտնաբերվել են խուզարկության արդյունքում:
Մասնավորապես, ըստ ՔԿ-ի, Մ.Պ.-ն, դեռևս չպարզված հանգամանքներում և ժամանակահատվածում, ձեռք է բերել «AK» տեսակի 2 ինքնաձիգ, ինչպես նաև՝ մարտական փամփուշտներ և նռնակ, որոնք ապօրինի փոխադրել և պահել է իր բնակության վայրի հարակից այգում: 2022-ի ընթացքում ինքնաձիգներից մեկը ապօրինի կերպով փոխադրել և պահել է իր՝ Մասիս համայնքի Այնթապ բնակավայրի տան հարակից այգում, իսկ մյուսը մտադրվել է իրացնել:
Իր մտադրության մասին, ըստ հաղորդագրության, նա տեղեկացրել է իր քենակալ, նույն բնակավայրի բնակիչ Ա.Մ.-ին՝ նրան առաջարկելով վաճառել դրանցից մեկը: Վերջինս էլ Երևան քաղաքի բնակիչ Մ.Ն.-ից տեղեկանալով ինքնաձիգ գնելու ցանկության մասին՝ այդ մասին տեղեկացրել է Մ.Պ.-ին:
Դրանից հետո Մ.Պ.-ն մորը հանձնարարել է Ա.Մ.-ին փոխանցել հրազենն ու ռազմամթերքի պահանջվող քանակը: Մայրը «AK» ինքնաձիգը, ինչպես նաև` 190 փամփուշտ, 6 պահունակ՝ լիցքավորված ևս 180 փամփուշտներով՝ ընդհանուր 370 փամփուշտ, նռնակ, օգոստոսի 19-ից օգոստոսի 21-ն ընկած ժամանակահատվածում ապօրինի կերպով փոխադրել և պահել է տան տարածքում, ապա՝ փոխանցել Ա.Մ.-ին:
Քննչականը հայտնում է, որ սեպտեմբերի 6-ին վերջինս ինքնաձիգն ու փամփուշտներն փոխադրել է Գորիսում գործող հյուրանոցի մոտ, որտեղ վաճառել է Երևանի վերոհիշյալ բնակչին, ով դրանք տեղավորել է Գևորգյանին պատկանող «SUBARU FORESTER 2.5» մակնիշի ավտոմեքենայի բեռնախցիկում, որից անմիջապես հետո ձերբակալվել է:
Ըստ հաղորդագրության, Մ.Ն.-ն մատնացույց է արել Աշոտ Գևորգյանի մեքենայի բեռնախցիկում եղած փաթեթը և հայտարարել, որ այն բեռնախցիկում դրել է Ա.Մ.-ն:
«Ներկայացված փաթեթում եղել է մասնատված մեկ հատ ինքնաձիգ, 2 փամփշտատուփ՝ յուրաքանչյուրը լիցքավորված 30-ական փամփուշտով, 190 հատ փամփուշտ, «Ջ1» տեսակի նռնակ` իր պայթուցիչով, «M 75» տեսակի նռնակ և դանակ: Ձերբակալվածներ Ա.Մ.-ն և Մ.Ն.-ն, մատնացույց անելով Գորիս քաղաքում գտնվող հյուրանոցի դիմային հատվածը, հայտարարել են, որ 2023թ. սեպտեմբերի 6-ին զենքը նշված հատվածում, առանց Ա.Գևորգյանին տեղեկացնելու փաթեթի պարունակության մասին, իրենք են դրել վերջինիս պատկանող «SUBARU FORESTER 2.5» մակնիշի ավտոմեքենայի մեջ», - ասված է հաղորդագրությունում:
ՔԿ-ն հայտնում է, որ ավելի վաղ ձերբակալված Մ.Բ.-ն և Ն.Ք.-ն Գևորգյանի հետ գտնվել են նույն ավտոմեքենայում:
Խուզարկություններ են կատարվել նաև ձերբակալվածների բնակության վայրերում, որի ընթացքում Ա.Մ.-ի տանը հայտնաբերվել է 484 հատ 5.45 մմ տրամաչափի, 290 հատ 7.62 մմ տրամաչափի փամփուշտ, ինքնաձիգի 4 պահունակ, «Ֆ-1», «Ջ-1» տեսակի նռնակներ, նռնակի պայթուցիչներ, սվին դանակներ, գազային ատրճանակ, օպտիկական սարք, կողմնացույց, դանակներ, սաղավարտ, զրահաբաճկոն, զինվորական համազգեստ, իսկ Մ.Ն.-ի՝ Երևանի բնակարանում հայտնաբերվել են ատրճանակ, պայթուցիկ սարքի նմանվող առարկաներ, 3 փաթեթ փամփուշտներ:
Խուզարկություններով ռազմամթերք հայտնաբերելու դեպքերով նախաձեռնվել են նոր քրեական վարույթներ, որոնք միացվել են ավելի վաղ նախաձեռնված վերոհիշյալ քրեական վարույթին:
