Հակակոռուպցիոն դատարանը թույլատրել է պաշտպանության նախկին նախարար Դավիթ Տոնոյանին օգոստոսի 1-ին և 2-ին Ազգային ժողովում մասնակցել 44-օրյա պատերազմի հանգամանքներն ուսումնասիրող քննիչ հանձնաժողովի նիստին, «Ազատությանը» հայտնեց բարձրաստիճան նախկին պաշտոնյայի փաստաբան Սերգեյ Հովհաննիսյանը։
Պաշտպանի փոխանցմամբ, դատարանը որոշումն այսօր առավոտյան է հրապարակել։
Հովհանիսյանը տեղեկացրեց, որ Տոնոյանի մասնակցությունը նիստին թույալտրելու համար նաև ԱԺ քննիչ հանձնաժողովն էր միջնորդություն ներկայացրել դատարան։
Ավելի քան 1.5 տարի անազատության մեջ գտնվող Տոնոյանը մեղադրվում է շուրջ չորսուկես միլիոն դոլար յուրացնելու համար։
«Անպիտան հրթիռների» գործով անցնող մյուս 5 մեղադրյալները, նրանց թվում Զինված ուժերի գլխավոր շտաբի նախկին պետ Արտակ Դավթյանը և զենքի մատակարար Դավիթ Գալստյանը ազատության մեջ են։
