Այսօր Մոսկվայում կհանդիպեն Հայաստանի, Ադրբեջանի և Ռուսաստանի արտգործնախարարները:
Սերգեյ Լավրովը, Արարատ Միրզոյանը և Ջեյհուն Բայրամովը եռակողմ բանակցություններից բացի նաև երկկողմ հանդիպումներ կունենան։
Ինչպես նշում է Ռուսաստանի արտգործնախարարությունը՝ բանակցությունների ընթացքում ԱԳ նախարարները «կվերլուծեն Լեռնային Ղարաբաղի շուրջ իրավիճակի դեէսկալացիայի ուղիները» և եռակողմ պայմանավորվածությունների կատարմանն ուղղված քայլերը։
Կքննարկվեն Տարածաշրջանում տրանսպորտային հաղորդակցությունների ապաշրջափակումը, Ադրբեջանի և Հայաստանի միջև սահմանի սահմանազատումը, իսկ՝ Բայրամովի և Միրզոյանի հետ առանձին հանդիպումներում Լավրովը նախատեսում է կենտրոնանալ «քաղաքական, առևտրի, տնտեսական և հումանիտար ոլորտների հարցերի քննարկման վրա»։
Նաև Հատուկ ուշադրություն կհատկացվի Բաքվի և Երևանի միջև խաղաղության պայմանագրի պատրաստմանը, հայտարարում է պաշտոնական Մոսկվան։
Ըստ Հայաստանի արտգործնախարարության՝ օրակարգում են տարածաշրջանային անվտանգության, Հայաստանի և Ադրբեջանի միջև հարաբերությունների կարգավորման հարցերը, հումանիտար խնդիրները:
Վերջին անգամ Միրզոյանն ու Բայրամովը հանդիպել են հունիսի 27-ին Վաշինգտոնում, իսկ Մոսկվայում Հայաստանի, Ռուսաստանի և Ադրբեջանի արտգործնախարները հանդիպել են մայիսի 19-ին։ Արարատ Միրզոյանի և Ջեյհուն Բայրամովի հետ նախ՝ երկկողմ, ապա՝ եռակողմ հանդիպումներից հետո, Սերգեյ Լավրովը հայտարարեց՝ Երևանն ու Բաքուն մոտ են տրանսպորտային հաղորդակցությունների ապաշրջափակման հարցում վերջնական համաձայնությանը, նաև մոտեցրել են դիրքորոշումները խաղաղության պայմանագրի շուրջ։
