Արցախի Մարտակերտի շրջանում երկու անչափահաս՝ երեքամյա և վեցամյա երեխա է մահացել, հայտնում է Ներքին գործերի նախարարության ոստիկանությունը։
Նշվում է, որ նախօրեին քաղաքացին դիմել է ոստիկանություն՝ հայտնելով, որ երեխաներին թողել է տանը առանց հսկողության, և ինքը աշխատանքի բերումով մեկնել է Մարտակերտ։ Երբ վերադարձել է, երեխաներին տանը չի գտել։
Մեկ այլ քաղաքացի այնուհետև ահազանգել է, որ իր ավտոմեքենայի մեջ երկու մահացած երեխա է հայտնաբերել:
«Կատարված քննության շրջանակներում ստուգվել են բոլոր տեսախցիկները, որոնք ֆիքսել են, որ անչափահաս երեխաները ինքնուրույն մտել են Մարտակերտ քաղաք, այնուհետև բացել նշված մեքենայի հետևի դուռը, քնել նստարանին։ Նախնական տվյալներով մահվան պատճառ է հանդիսացել մեքենայում բարձր ջերմաստիճանը», - ասված է հաղորդագրության մեջ։
Արցախի ՔԿ հաղորդմամբ՝ անչափահասների ողբերգական մահվան դեպքի առթիվ Քննչական կոմիտեում հարուցվել է քրեական գործ:
