Մեծանուն կինոռեժիսոր Սերգեյ Փարաջանովի ծննդյան100-ամյա հոբելյանին ընդառաջ արդեն իսկ ձևավորվում է մի ուշագրավ հայ-ֆրանսիական նախագիծ, որի հեղինակը Ֆրանսիայում բնակվող մեր հայրենակցուհի ռեժիսոր, թարգմանիչ, դերասանուհի, ֆրանսիական «Սաթէ-Աթղը» թատերական միության գեղարվեստական ղեկավար ՍաթԷ Խաչատրյանն է։
Այս նախագիծը «Նռան գույնը» խորագրով պարային մի բեմադրություն է, որի իրականացմանը իրենց գործուն մասնակցությունն են բերում մի շարք հայկական և ֆրանսիական կազմակերպություններ, դերասաններ, պարարվեստի ներկայացուցիչներ, պարուսույցներ։
«Նախագծի գաղափարը ծնվել է դեռ երկու տարի առաջ, և մենք սկսել ենք աշխատել։ Առհասարակ ասեմ, որ մեր թատերական միությունը Ֆրանսիայում զբաղվում է հայկական մշակույթի հանրահռչակմամբ բացառապես պրոֆեսիոնալների միջոցով և ֆրանսիական թատերական միությունների միջոցով։ Հետևաբար մեզ համար շատ կարևոր է ամեն անգամ հայկական մշակույթը, ոչ նյութական մշակութային ժառանգությունը ներկայացնել լայն զանգվածներին և չմնալ համայնքային մտածողության և տրամաբանության մեջ։ Չանել բաներ հայկական համայնքի հետ և հայկական համայնքնի համար, այլ մեր մշակույթը ներկայացնել մյուս բոլոր մշակույթներին հավասար տրամաբանության մեջ։ Հետևաբար մենք այդ տրամաբանության մեջ լինելով բեմադրել ենք «Սասնա Ծռեր» էպոսը ֆրանսիացիների հետ, Թումանյանի հեքիաթները, Կոմիտասին նվիրված ներկայացումը, որը կոչվում է «Իլիկ», 2020 թվականի 44-օրյա պատերազմին նվիրված ներկայացում, որի տեքստը նույնպես գրել եմ ես և կոչվում է «Ես զինվոր եմ կրում»։ Հետևաբար, Փարաջանովին անդրադառնալը անշուշտ կարևոր էր և մտնում էր մեր ծրագրերի մեջ», - «Ազատության» հետ զրույցում ասաց Սաթէ Խաչատրյանը։
2024 թվականի հունվարի 9-ին է լրանում Սերգեյ Փարաջանովի ծննդյան 100-ամյա հոբելյանը, որի շրջանակներում թե' Ֆրանսիայում, թե' Հայաստանում արդեն հաջորդ տարվանից կցուցադրվի Փարաջանովին նվիրված «Նռան գույնը» հայ-ֆրանսիական համատեղ պարային բեմադրությունը. - «Ոչ թե մենք անմիջական վերարտադրությունն ենք անելու ֆիլմի, այլ ներշնչված ենք ֆիլմից։ Ունենք հինգ պարող, որոնք ֆրանսիացի են, երկու պարուհիներ, որոնք ընտրվեցին երեկ Հայաստանից։ Բեմանկարիչը ֆրանսիացի է, հագուստների նկարիչը Էդգար Մանուկյանն է, ներկայացման ողջ երաժշտական ստեղծագործությունը ներկայացնելու է «Հոխ» խումբը Հայաստանից, երաժշտությունը լինելու է էլեկտրո, ժամանակակից և հայկական ժողովրդական երաժշտության համադրությունը»։
Փարաջանովին նվիրված այս պարային բեմադրության իրականացման համար Սաթե Խաչատրյանը դիմել է Ֆրանսիացի անվանի պարուսույց, խորեոգրաֆ Մուրադ Մերզուկիին, որի հետ էլ իրենց մեծ խմբով այս օրերին նախագծի իրականացման մեջ ներգրավված անձինք գտնվում են Երևանում. - «Այս նախագիծը իրականացնելու համար ես դիմել եմ Մուրադ Մերզուկիին, Ֆրանսիայում շատ հայտնի և ամբողջ աշխարհում հայտնի խորեագրաֆ։ Եվ ես ցանկանում էի, որ մեր խոշոր կինոգործչին ներկայացներ նաև մեկը, ով հայկական մշակույթին ծանոթ չէ, որպեսզի ավելի ինչ-որ առումով ամբողջական և ազգային արմատներով չպայմանավորված հայացքով ներկայացներ։ Եվ իսկապես Մուրադը լագագույն տարբերակն է։ Նրա հետ աշխատելը մեծ պատիվ է բոլոր արվեստագետների համար։ Եվ ես վստահ եմ, որ նա լավագույնս կներկայացնի այս ներկայացումը»։
Ներկայացման իրականացմանն աջակցում են նաև ԿԳՄՍ նախարարությունը և Փարաջանովի թանգարանը։ Նախատեսված է, որ այս ներկայացման առաջնախաղը կկայանա 2024 թվականին ֆրանսիական երկու թատրոններում, ապա արդեն մարտ ամսին բեմադրությունը կցուցադրվի Երևանում։
Սաթէ Խաչատրյանի խոսքով, այս բեմադրությունը այդուհետ կցուցադրվի ոչ միայն մի շարք ֆրանսիական քաղաքներում, այլև այլ երկրներում. - «Այսօր նաև պայմանավորվածություններ ենք փորձում ձեռք բերել Արգենտինայի հետ, Արգենտինայում Հայաստանի դեսպանության հետ ենք կապվել, Ճապոնիայում հայկական դեսպանության։ Եվ հույս ունենք, որ ներկայացումը կունենա նաև համաշխարհային հյուրախաղերի շարք, որը հնարավորություն կտա աշխարհին ծանոթանալու Փարաջանովի արվեստին, Փարաջանովի աշխարհին, մտածողությանը պարային ներկայացման միջոցով»։
