Ադրբեջանի արտգործնախարարության խոսնակ Այխան Հաջիզադեն հայտարարել է, որ «Ադրբեջանն ընդամենը պատասխանել է ռազմական սադրանքին, որի հետևանքով ադրբեջանցի զինծառայող է վիրավորվել»։
Ադրբեջանցի պաշտոնյան, արձագանքելով Հայաստանի վարչապետ Նիկոլ Փաշինյանի հայտարարությանը, պնդել է՝ «Հայաստանը պետք է ամբողջովին դուրս բերի զորքը Ադրբեջանի տարածքից»։
«Ադրբեջանի ներքին գործերին խառնվելու փոխարեն Հայաստանը պետք է իր պարտավորությունները կատարի և հարգի Ադրբեջանի տարածքային ամբողջականությունը թե՛ խոսքով, թե՛ գործով»,- հայտարարել է Ադրբեջանի ԱԳՆ-ի խոսնակը։
Վարչապետ Փաշինյանն այսօր ավելի վաղ Թվիթերում գրառում է կատարել՝ միջազգային հանրությանը կոչ անելով Լեռնային Ղարաբաղի բնակչության իրավունքները և անվտանգությունն ապահովելու գործնական քայլեր ձեռնարկել:
«Մինչ Լաչինի միջանցքն ապօրինի արգելափակված է, այս գիշեր անօդաչու թռչող սարքի կիրառմամբ ադրբեջանական հարձակման հետևանքով 4 մարդ է զոհվել», - գրել է Փաշինյանը։
