ՌԴ Անվտանգության խորհրդի նախագահի տեղակալ Դմիտրի Մեդվեդևը, ով նաև մեկ ժամկետով Ռուսաստանի նախագահ է եղել, զգուշացրել է, որ «Վագների» խռովության հաջողությունը կնշանակի՝ նրանք կտիրեն Ռուսաստանի միջուկային ահռելի զինանոցին և իրական սպառնալիք կստեղծեն ամբողջ աշխարհի համար։
«Մարդկային ամբողջ պատմությունը դեռ չի տեսել, որ միջուկային մեծ զինանոցը հայտնվի բանդիտների վերահսկողության տակ», - ռուսական լրատվամիջոցի հարցազրույցում ասել է Մեդվեդևը՝ հավելելով, թե նման ճգնաժամը չի սահմանափակվի միայն մեկ երկրի սահմաններով՝ աշխարհը կդրվի ոչնչացման եզրին։
«Իրադարձությունների նման շրջադարձ մենք չենք թույլատրի»,- ասել է Մեդվեդևը, ով Ուկրաինա ներխուժելուց հետո ռուսաստանյան ամենակոշտ հռետորներից էր և բազմիցս սպառնացել էր նաև միջուկային զենքով։
Նրա կարծիքով՝ Պրիգոժինի խռովությունը լավ պլանավորած գործողություն է, որի նպատակն է գրավել իշխանությունը։ Նա պնդել է, որ խռովության հետ հնարավոր է՝ առնչվում են ռուսական զինվորական էլիտար ստորաբաժանումների որոշ վետերաններ և արտերկրի դերակատարներ։
