«100 տարի լիտվացիներն ապրել են Մոսկվայի դաժան ավազակապետության եզրին, գիտակցելով, որ քաոսային հաջոդ պայթյունը ժամանակի հարց է։ Մենք շփոթված չենք։ Նպատակը ինչպես միշտ Ուկրաինայի համար հաղթանակն է ու արդարությունը։ Հիմա է ժամանակը», - ասել է Լիտվայի ԱԳ նախարար Գաբրիելիուս Լանդսբերգիսը։
«Էստոնիան ուշադիր հետևում է Ռուսաստանում իրավիճակի զարգացմանը և տեղեկատվություն փոխանակում դաշնակիցների հետ։ Կարող եմ վստահեցնել, որ մեր երկրին ուղղակի վտանգ չկա։ Սահմանների անվտանգությունը ուժեղացվել է։ Ես նաև հորդորում եմ մեր քաղաքացիներին չմեկնել Ռուսաստանի որևէ շրջան»,- Twitter-ի իր էջում գրել է Էստոնիայի վարչապետ Կայա Կալլասը։
Լատվիայի նախագահ Էգիլս Լևիտսը ասել է, որ երկրի ղեկավարությունը և համապատասխան իշխանությունները անդադար հետևում են Ռուսաստանում զարգացող իրադարձություններին և դիտարկում անհրաժեշտ միջոցներ։ Օպերատիվ ուժեղացվել է Ռուսաստանի հետ սահմանի վերահսկողությունը։ Սահմանապահ ծառայությունը, պաշտպանության նախարարությունը, ներքին գործերի նախարարությունը և համապատասխան ծառայությունները մշտական կապի մեջ են գտնվում, նշել է նա։
Անվտանգության դաշնային ծառայությունը քրեական գործ է հարուցել «Վագներ» մասնավոր ռազմական խմբավորման ղեկավար Եվգենի Պրիգոժինի դեմ`ռազմական հեղաշրջման կոչ հնչեցնելու համար: Պրիգոժինն, իր հերթին, մեղադրում է Ռուսաստանի պաշտպանության նախարարությանը իր վարձկանների ուղղությամբ կրակ բացելու համար: Երեկ ուշ երեկոյան նա հայտարարել է, թե «արդարության երթ է սկսում» նախարարության դեմ`կոչ անելով ռուսաստանցիներին միանալ իրեն: Այսօր խմբավորումը հայտարարում է Ռոստովում վերահսկողության մասին։
Վլադիմիր Պուտինն այդ քայլերն անվանեց խռովություն, դավաճանություն, հարված թիկունքին։
