ՄԱԿ-ի գլխավոր քարտուղար Անտոնիո Գուտերեշը հավանություն է տալիս արհեստական բանականության խնդրով միջազգային գործակալություն ստեղծելու առաջարկին:
Նրա պատկերացմամբ, դա կարող է լինել Ատոմային էներգիայի միջազգային գործակալության նման կառույց:
Գաղափարն առաջարկել են արհեստական բանակցության խնդրով զբաղվող ՏՏ ոլորտի մի շարք առաջատար ընկերությունների բարձրաստիճան ղեկավարներ:
Թեման հրատապություն է ստացել այն բանից հետո, երբ կես տարի առաջ համացանցում տարածվել է ChatGPT-ը՝ արհեստական բանականությամբ «բոտը»: Դա հատուկ ծրագիր է, որն օգտատիրոջ հետ կարող է «երկխոսության» մեջ մտնել:
ChatGPT-ն դարձել է տեղեկատվական ոլորտի պատմության ընթացքում ամենաարագ տարածումը գրանցած հավելվածը:
ChatGPT-ը մտահոգություն է առաջացրել, քանի որ դրա օգնությամբ հնարավոր է ստեղծել բնօրինակից գրեթե չտարբերվող լուսանկարներ և վտանգավոր կեղծ տեղեկատվություն սփռել:
Բացի այդ, օգտատիրոջ հանձնարարությամբ այն կարող է «ստեղծագործել»՝ գրել տարատեսակ «աշխատություններ»:
«Արհեստական բանականության վերջին տեսակի՝ գեներատիվ ԱԲ-ի վերաբերյալ ահազանգում են հենց դրա հեղինակները, նրանք, ովքեր նախագծել են այն: Մենք պարտավոր ենք ամենայն լրջությամբ ընդունել նրանց ահազանգը», - հայտարարել է Գուտերեշը:
ՄԱԿ-ի գլխավոր քարտուղարը մտադիր է մինչև այս տարեվերջ աշխատել խորհրդատվական մարմին ստեղծելու վրա:
Այդ կառույցը պետք է վերանայի արհեստական բանականության կառավարման կարգավորումները և առաջարկություններ ներկայացնի հանուն ընդհանուր բարօրության՝ ԱԲ-ի կիրառումը մարդու իրավունքների և օրենքի գերակայությանը համապատասխանեցնելու վերաբերյալ:
