Վարչապետ Նիկոլ Փաշինյանն աշխատանքային այցով ժամանել է Թուրքիա:
Ըստ Հայաստանի վարչապետի գրասենյակի՝ Փաշինյանին ուղեկցում է Ազգային ժողովի փոխնախագահ, Հայաստան-Թուրքիա երկխոսության գործընթացում Հայաստանի հատուկ ներկայացուցիչ Ռուբեն Ռուբինյանը:
Անկարայի «Էսենբոգա» միջազգային օդանավակայանում Հայաստանի վարչապետին դիմավորել է Հայ-թուրքական հարաբերությունների կարգավորման հարցով հատուկ ներկայացուցիչ, դեսպան Սերդար Քըլըչը:
Վարչապետը ներկա կգտնվի Թուրքիայի նախագահ Ռեջեփ Թայիփ Էրդողանի երդմնակալության արարողությանը:
Առաջին անգամն է, որ Հայաստանը մասնակցում է այս արարողությանը պետության ղեկավարի մակարդակով։ Անկախ Հայաստանի պատմության մեջ Հայաստանը Թուրքիայի նախագահի երդմնակալությանը մինչ այս միայն մեկ անգամ է մասնակցել՝ 9 տարի առաջ 2014-ի օգոստոսի 28-ին՝ արտգործնախարարի մակարդակով։
Ռեջեփ Էրդողանը երդմնակալությամբ արդեն ստանձնել է Թուրքիայի նախագահի պաշտոնը։ Արարողությունը տեղի է ունեցել Թուրքիայի խորհրդարանում՝ Ազգային մեծ ժողվում։
Ինագուրացիան ավելի ուշ անցկացվելու է նախագահական նստավայրում։ Արարողությանը հրավիրված են տասնյակ երկրների ղեկավարներ ու բարձրաստիճան պաշտոնյաներ, այդ թվում՝ Հայաստանի վարչապետը։
Ադրբեջանի նախագահը նույնպես մասնակցելու է արարարողությանը, սակայն Փաշինյան-Ալիև հնարավոր հանդիպման մասին չի հաղորդվել:
Փաշինյանն ու Էրդողանն առաջին անգամ հանդիպել են 2022-ի հոկտեմբերի 6-ին Պրահայում։ Երկու երկրների առաջնորդները Չեխիայում էին՝ մասնակցելու Եվրոպական քաղաքական համայնքի առաջին գագաթնաժողովին։
Այսօր մոտ քսան երկրների առաջնորդներ են Անկարա, ինագուրացիային կմասնակցի նաև ՆԱՏՕ-ի գլխավոր քարտուղարը:
Էրդողանը 5 տարի ժամկետով նախագահի պաշտոնը ստանձնեց արդեն 3-րդ անգամ՝ օգտագործելով սահմանադրական փոփոխությունների պատրվակը։ Մինչ այդ նա ևս 10 տարի երկիրը կառավարել էր վարչապետի պաշտոնում, երբ Թուրքիայում խորհրդարանական կառավարման համակարգ էր։
