Ըստ պաշտոնական Բաքվի` Երևանը դեմ է խաղաղության համաձայնագրի տեքստում Ադրբեջանի նկատմամբ տարածքային հավակնությունները բացառող կետին: Այդ մասին ասել է Ադրբեջանի արտգործնախարարության խոսնակ Այխան Հաջիզադեն՝ արձագանքելով Հայաստանի վարչապետ Նիկոլ Փաշինյանի երեկ հնչեցրած հայտարարություններին:
«Հայաստանը հետաքրքրված չէ խաղաղության համաձայնագրով, քանի որ դեմ է համաձայնագրի տեքստում Ադրբեջանի նկատմամբ տարածքային հավակնությունները բացառող կետերին», - հայտարարել է Հաջիզադեն՝ Փաշինյանին մեղադրելով նաև անտարբերության մեջ։
«Այն, որ Հայաստանի վարչապետն ասուլիսի ժամանակ հայտարարում է, թե պատրաստ է ստորագրել {խաղաղության պայմանագրի} նախագիծը, որում նշվում էին միայն Հայաստանի առաջարկները և հաշվի չէին առնվում Ադրբեջանի առաջարկները, խաղաղ գործընթացի նկատմամբ նրա անտարբերության ևս մեկ ապացույց է», - պնդել է Ադրբեջանի արտգործնախարարության խոսնակը:
Հաջիզադեն միջազգային հանրությանը կոչ է արել դատապարտել և կանխել «Հայաստանի այդ ապակառուցողական գործողությունները»։
Նիկոլ Փաշինյանը երեկ ասուլիսի ժամանակ հայտարարեց, մասնավորապես, որ Ադրբեջանը փորձում է խաղաղության հնարավոր պայմանագրի միջոցով Հայաստանի նկատմամբ տարածքային պահանջներ ձևակերպել, Լեռնային Ղարաբաղում ցեղասպանություն կամ էթնիկ զտումներ իրականացնելու մանդատ ձեռք բերել, ինչը, ըստ վարչապետի, հայկական կողմի համար կարմիր գիծ է։
