Սան Դիեգոյի ռազմածովային ուժերի բազայում ԱՄՆ-ի նախագահ Ջո Բայդենը, Ավստրալիայի վարչապետ Էնթոնի Ալբանիզը և Բրիտանիայի վարչապետ Ռիշի Սունակը երեկ ստորագրեցին համատեղ ջանքերով միջուկային շարժիչներով սուզանավեր ստեղծելու եռակողմ համագործակցության համաձայնագիր։
Բայդենն այդ ծրագիրը կոչեց Հնդկական և Խաղաղօվկիանոսյան տարածաշրջանում ազատություններ ապահովելու նախաձեռնության մի մաս, որն իրականացվում է հուսալի գործընկերների հետ։
Ըստ համաձայնագրի՝ ամերիկյան և բրիտանական սուզանավերը մինչև ոչ ուշ քան 2027 թվականը ռոտացիոն կարգով բազավորվելու են Ավստրալիայի արևմտյան ափին, զսպման ծրագրերով օգնելու և ուսուցանելու են ավստրալացի ծովայիններին։
Համաձայնագիրը ենթադրում է, որ 1950-ից հետո առաջին անգամ ԱՄՆ-ը կիսվելու է իր տեխնոլոգիաներով՝ միջուկային սուզանավեր կառուցելու գործում։
ԱՄՆ-ն Ավստրալիային տրամադրելու է Virginia տեսակի երեք սուզանավ՝ միջուկային ուժեղացուցիչներով։ Դրանք կառուցելու է General Dynamics ընկերությունը։ Բրիտանիան և Ավստրալիան ամերիկյան տեխնոլոգիաների և բրիտանական ծրագրերի հիման վրա նոր սերնդի սուզանավեր են կառուցելու։
