Ֆինլանդիայի նախագահ Սաուլի Նիինիստոյի համոզմամբ՝ իր երկիրը և հարևան Շվեդիան ՆԱՏՕ-ի հուլիսին՝ Վիլնյուսում կայանալիք գագաթաժողովին կմասնակցեն արդեն որպես դաշինքի լիիրավ անդամներ։ Այս մասին Ֆինլանդիայի նախագահը հայտարարել է տեղական լրատվամիջոցների հետ զրույցում։
«Նախորդ տարվա գարնանը Հելսինկին և Ստոկհոլմը բազմաթիվ քաջալերող խոսքեր էին լսում ՆԱՏՕ-ից։ Դրանց համաձայն անդամակցության գործընթացը շատ սահուն է անցնելու։ Դա, սակայն, տեղի չունեցավ», - նշել է Ֆինլանդիայի նախագահը՝ պնդելով, թե իր ընկալմամբ սա արդեն ներդաշինքային խնդիր է։
«ՆԱՏՕ-ի անդամները իրենք են զարմացել», - նշել է Նիինիստոն՝ ընդգծելով, որ այժմ Ֆինլանդիայի և Շվեդիայի անդամակցության հեռանկարները կախված են բացառապես Թուրքիայի նախագահի կամքից։
«Ես չեմ կարծում, թե Էրդողանը որևէ պարագայում կնահանջի հանրային կարծիքի ճնշման ներքո։ Ինչ-որ բան տեղից կարող է շարժվել միայն, եթե առաջընթաց արձանագրվի ԱՄՆ և Թուրքիայի երկկողմ բանակցություններում», - նշել է Ֆինլանդիայի նախագահը։
