Պաշտպանության նախարար Սուրեն Պապիկյանը և Անվտանգության խորհրդի քարտուղար Արմեն Գրիգորյանը հանդիպումներ են ունեցել Մարչին Վիդրայի գլխավորած ԵՄ տեխնիկական գնահատման առաքելության հետ:
ՊՆ-ից փոխանցում են, որ հանդիպմանն ամփոփվել է դեկտեմբերին ավարտված առաքելության գործունեությունը` հույս հայտնելով, որ այն արդյունավետ կշարունակվի նաև նոր առաքելության գործունեության ընթացքում:
ԵՄ նոր առաքելության մասին Եվրոպական միության արտաքին հարաբերությունների գծով գլխավոր հանձնակատար Ժոզեպ Բորելն էր հայտարարել, նշելով, որ միությունը Հարավային Կովկասում իր ներգրավվածության նոր փուլ է սկսում՝ նոր, անցումային թիմով, որը հիմքեր կստեղծի Հայաստանում հնարավոր առավել երկար ժամկետով ԵՄ առաքելության տեղակայման համար: Նա ընդգծել էր՝ այդ առաքելության նպատակն է ի վերջո նպաստել կողմերի միջև վստահության ամրապնդմանը։
Պատվիրակության հետ հանդիպմանը Սուրեն Պապիկյանը ներկայացրել է նաև տարածաշրջանային վերջին զարգացումները, մասնավորապես Ադրբեջանի կողմից դեկտեմբերի 12-ից Լաչինի միջանցքի փակումը և դրա հետևանքով ի հայտ եկած հումանիտար լուրջ մարտահրավերները:
Պաշտպանության նախարարը բարձր է գնահատել ԵՄ ներգրավվածությունը տարածաշրջանում խաղաղության և կայունության ամրապնդման գործում` հատկապես կարևորելով դիտորդական առաքելությունների դերը, և հայտնել է Պաշտպանության նախարարության պատրաստակամությունը շարունակելու բոլոր միջոցներով աջակցել ԵՄ նոր դիտորդական առաքելությանը:
Հայաստանի անվտանգության խորհրդի քարտուղար Արմեն Գրիգորյանը և ԵՄ տեխնիկական գնահատման խմբի անդամներն անդրադարձել են ԵՄ նոր քաղաքացիական առաքելության գործունեության շրջանակներին, դրա տեղակայմանը և քննարկել երկկողմ հետաքրքրություն ներկայացնող այլ հարցեր:
ԱԽ գրասենյակի փոխանցմամբ՝ հանդիպմանը ներկա է եղել նաև Հայաստանում ԵՄ պատվիրակության ղեկավար Անդրեա Վիկտորինը:
Պատվիրակությանն օրերս ընդունել էր նաև ԱԳ նախարար Արարատ Միրզոյանը։
