Ամերիկայի Միացյալ Նահանգների Կոնգրեսի Ներկայացուցիչների տան հանրապետականների փոքրամասնության ղեկավար Քևին ՄըքՔարթին երեկ ավարտված միջանկյալ ընտրությունների արդյունքում, ամենայն հավանականությամբ, պալատի խոսնակի դերում կփոխարինի դեմոկրատական Նենսի Փելոսիին:
«Թույլ տվեք ասեմ, որ երբ վաղն արթնանաք, մենք կլինենք Ներկայացուցիչների տան մեծամասնություն, իսկ Նենսի Փելոսին՝ փոքրամասնություն: Ամերիկայի ժողովուրդը պատրաստ է տեսնել մեծամասնություն, որը կառաջարկի նոր ուղի, որն ամերիկացիներին կվերադարձնի ճիշտ ուղու վրա, հանրապետականները պատրաստ են դա անել»,- ասել է ՄըքՔարթին:
Նա խոստացել է, որ հանրապետականներն ամեն ինչ կանեն երկրի տնտեսությունը զարգացնելու և շարքային ընտանիքների կենսամակարդակը բարձրացնելու համար:
Երեկվա միջանկյալ ընտրությունների արդյունքում հանրապետականները մեծամասնություն են ապահովում Ներկայացուցիչների տանը:
Այդ կանխատեսումն են անում բոլոր հեղինակավոր ամերիկյան լրատվամիջոցները: Կոնգրեսի մյուս պալատում՝ Սենատում, այս պահին երկու կուսակցություններից և ոչ մեկը հստակ առաջատարի դիրքում չէ:
Երեկ տարբեր նահանգներում տեղի են ունեցել նաև նահանգապետերի ընտրություններ: Երեկվա քվեարկությունների վերջնական արդյունքները դեռ չեն ամփոփվել:
