Վաշինգտոնում, ամերիկյան կողմի նախաձեռնությամբ, սկսվել է Հայաստանի, Ադրբեջանի ու Միացյալ Նահանգների արտգործնախարարների հանդիպումը:
Բանակցությունների մեկնարկին պետքարտուղար Էնթոնի Բլինքենն ասել է, թե Երևանն ու Բաքուն «խիզախ քայլեր են ձեռնարկում խաղաղության հասնելու ուղղությամբ», և որ Վաշինգտոնը աջակցում է այդ ջանքերին : Այլ մանրամասներ Էնթոնի Բլինքենը չի հաղորդել, սակայն հույս է հայտնել, որ շուտով հնարավոր կլինի Հարավային Կովկասում խաղաղության հասնել:
Եռակողմ բանակցություններից առաջ հայկական ու ադրբեջանական պատվիրակությունները հանդիպել էին երկկողմ ձևաչափով: Բլինքենն ընդգծել է, որ «ուղիղ երկխոսությունը տևական խաղաղության տանող լավագույն ձևն է»:
