Չինաստանի կոմունիստական կուսակցության կենտրոնական կոմիտեն այսօր դռնփակ նիստում նախագահ Սի Ծինպինին քվեարկությամբ երրորդ անգամ անընդմեջ ընտրել է գլխավոր քարտուղար:
Ենթադրվում է, որ նա կպահպանի պետության ղեկավարի և ռազմական կենտրոնական խորհրդի նախագահի պաշտոնները:
Կոմկուսի կենտրոնական կոմիտեի նիստում քվեարկությամբ ընտրվել է նաև քաղաքական բյուրոն, որի կազմում յոթ մշտական անդամներ են՝ Սի Ծինպինը, Լի Ցզյանը, Չժաո Լեցզին, Վան Հունինը, Լի Սին, Ցայ Ցին և Դին Սյուեսյանը:
2023 թվականի մարտին տեղի կունենա խորհրդարանի՝ Ժողովրդական ներկայացուցիչների համաչինաստանյան համագումարը, որը պետական առանցքային պաշտոններում կհաստատի քաղբյուրոյի անդամներին:
Այսօրվա վերընտրությամբ Սի Ծինպինը դարձել է արդիական Չինաստանի պատմության ընթացքում ամենաերկարակյաց և հզոր ղեկավարը հանրապետության հիմնադիր Մաո Ցզե Դունից հետո:
Կոմունիստական կուսակցության համագումարը հաստատել է կանոնադրության երկու լրամշակումներ, որոնցից մեկով Սի Ծինպինը հռչակվել է «Կենտրոնական կոմիտեի և ամբողջ կոմկուսի առանցքը», մյուսն էլ պարտավորեցնում է բոլոր կուսակցականներին «պաշտպանել գլխավոր քարտուղարին»:
Արևմտյան վերլուծաբանների համոզմամբ՝ Չինաստանում սկսվել է Սի Ծինպինի անձի պաշտամունք: Հետայսու նա կարող է ցկյանս իշխել և կարգավիճակով հավասարվել է անցյալում երկիրը ղեկավարած Մաո Ցզե Դունին և Դեն Սյաո Պինին:
