«Սուրմալու» առևտրի կենտրոնում տեղի ունեցած պայթյունի հետևանքով մասնակի կանգուն մնացած մասնաշենքը, սեփականատիրոջ կողմից իրականացված աշխատանքների արդյունքում քանդվել է, տեղեկացնում է Երևանի քաղաքապետարանը՝ նշելով՝ տարածքը մաքրվել է, շինարարական աղբը՝ տեղափոխվել:
Ըստ հաղորդագրության՝ աշխատանքներ են տարվում նաև հարակից մայթի բարեկարգման ուղղությամբ:
Քաղաքապետարանը նշում է, որ այսօրվանից Քրիստափորի փողոցում երթևեկությունը երկկողմանի վերականգնվել է։
«Սուրմալու» առևտրի կենտրոնում առնվազն16 մարդու, այդ թվում՝ հղի կնոջ և երեխայի կյանք խլած պայթյունից գրեթե երկու ամիս էր անցել, իսկ փլուզված շենքը դեռ տեղում էր: Երեք շաբաթ առաջ ուժեղ քամուց շենքի պատերից մեկը փլուզվեց՝ վնասելով 3 անձի։ Արտակարգ իրավիճակների նախարարությունը դեռ պայթյունից շաբաթներ անց էր եզրահանգել, որ շենքը ենթակա է անհապաղ քանդման։ Շինության սեփականատերը, որին պայթյունից հետո պարտավորեցրել էին քանդել իրեն պատկանող կառույցը, միայն սեպտեմբերի վերջին էր դիմել քաղաքապետարան՝ քանդման թույլտվություն ստանալու համար։
«Սուրմալու» առևտրի կենտրոնի պայթյունից 9 օր անց միակողմանի բացվեց դրա հանդիպակաց Քրիստափորի փողոցն ու «Փեթակ» առևտրի կենտրոնը, որը փակվել էր աղետից անմիջապես հետո։ ԱԻՆ-ը հայտարարեց՝ ոստիկանության հետ որոշել են բացել ճանապարհը՝ պահպանելով անվտանգության կանոնները՝ շեշտելով, թե անվտանգության հետ կապված խնդիրների պատճառով ճանապարհի մի կողմը փակ է մնում։ «Փեթանի» աշխատողները բողքի ցույցեր էին անում ու պահանջում փողոցն ամբողջությամբ բացել՝ առևտրի նախկին տեմպը վերականգնելու համար՝ պնդելով՝ գումար են կորցնում։
