Ռուսաստանի իշխանությունները ահաբեկչական կազմակերպությունների ցանկում են ներառել Meta կորպորացիան, որին են պատկանում Facebook և Instagram սոցիալական ցանցերը։ Այդ ցուցակում ընդգրկվել է նաև «Վեսնա» հակապատերազմական երիտասարդական շարժումը, այս մասին հայտնում են ռուսաստանյան լրատվամիջոցները։
«Վեսնան» ծայրահեղական կազմակերպություն ճանաչելու և դրա գործունեությունը երկրում արգելելու պահանջով է հանդես եկել Սանկտ Պետերբուրգի դատախազությունը։ Ուկրաինա Ռուսաստանի ներխուժումից ի վեր երիտասարդական շարժումը ակտիվ մասնակցում է հակապատերազմական ցույցերին և ակցիաներին։
Անցած մայիսին շարժման մի խումբ ակտիվիստների դեմ քրեական գործեր են հարուցվել, որոնց երկարամյա ազատազրկում է սպառնում։
Meta ամերիկյան կորպորացիան Ռուսաստանում արգելվել և ծայրահեղական է ճանաչվել Մոսկվայի դատարանի կողմից դեռևս այս տարվա մարտ ամսին։ Որոշման արդյունքում արգելափակվել են կորպորացիային պատկանող Facebook ու Instagram սոցիալական ցանցերը։