Բելառուսի պաշտպանական գերատեսչության ղեկավարը հայտարարել է, թե իր երկիրը չունի Ուկրաինայի հետ պատերազմելու մտադրություն:
«Մեզ մի սադրեք, մենք ձեր կամ որևէ այլ երկրի հետ կռվելու ծրագիր չունենք: Ոչ լեհերի, ոչ լիտվացիների, առավել ևս ուկրաինացիների հետ պատերազմել չենք ցանկանում, եթե սխալ քայլերի չդիմեք՝ պատերազմ չի լինի»,- ասել է նախարար Վիկտոր Խրենինը:
Միաժամանակ նա ընդգծել է, թե Բելառուսում արձանագրում են «Ուկրաինայի կողմից ակտիվ գործողություններ, որոնք կարող են վկայել Բելառուսի նկատմամբ հնարավոր ագրեսիայի մասին»:
«Եթե մեր տարածքի գոնե մեկ մետր ենթարկվի ագրեսիայի, մեր պատասխանն, ինչպես գերագույն գլխավոր հրամանատարն է ասել՝ կլինի կայծակնային և կոշտ: Դրա համար կոչ ենք անում զերծ մնալ սադրանքներից»,- հայտարարել է Խրենինը:
Վերջին շրջանում Մինսկը Կիևին մեղադրում է ագրեսիվ մտադրությունների համար: Վերլուծաբանները չեն բացառում, որ այդպես Բելառուսը հող է նախապատրաստում Ուկրաինայի վրա հարձակվելու և Ռուսաստանին ընթացող պատերազմում սատարելու համար:
