Իրանը կոչ է անում հայ-ադրբեջանական տարաձայնությունները կարգավորել խաղաղ ճանապարհով։ Այս ուղերձը, ըստ իրանական IRNA գործակալության, փոխանցել է Իրանի զինված ուժերի գլխավոր շտաբի պետ Մոհամադ Հոսեյն Բաղերին՝ Ադրբեջանի պաշտպանության նախարար՝ Զաքիր Հասանովի հետ հեռախոսազրույցի ժամանակ։
Ըստ իրանական կողմի՝ Ադրբեջանի պաշտպանության նախարարն ասել է, թե Բաքուն հավակնություններ չունի Հայաստանի տարածքի նկատմամբ, ռազմական գործողություններ չի ծրագրում այդ նպատակով, և կարծում է, որ խնդիրները կարող են լուծվել բանակցություններով։
Սեպտեմբերի 13-ի կեսգիշերին հայ - ադրբեջանական սահմանին սկիզբ առած ինտենսիվ ռազմական գործողությունների հետևանքով, ըստ պաշտոնական տվյալների, հայկական կողմից 206 զոհված և անհետ կորած կա, առնվազն 20 ռազմագերի, ադրբեջանական կողմից՝ 80 զոհված, երկու կողմերը հարյուրավոր վիրավորներ ունեն: Սեպտեմբերի 14-ի երեկոյան հայտարարվել է հրադադարի մասին: Այն, սակայն, պարբերաբար խախտվում է, ինչի հետևանքով հայկական կողմն արդեն 3 զոհ և մեկ վիրավոր ունի, ադրբեջանականը՝ 4 վիրավոր:
Սեպտեմբերի 28-ի ժամը 22-ից իրավիճակը սահմանին հարաբերականորեն կայուն է:
