Սվերդլովսկի շրջանում տեղակայված զորամասի տարածքում հայտնաբերվել է 46-ամյա զինվորագրված Վլադիմիր Պոտանինի դին: Պոտանինը բնակվել է Կուրգանում և զորակոչվել է սեպտեմբերի 26-ին:
Ըստ պաշտոնապես դեռևս չհաստատված հաղորդագրության, մահացած տղամարդու դիակի մոտ գտել են ածելի, որով զորակոչիկը, ենթադրաբար, իրեն մահացու վիրավորում է հասցրել:
Սվերդլովսկի շրջանի Պորոշինո գյուղում տեղակայված է ուսումնական զորամասը, որտեղ Պոտանինը պետք է դասընթացների մասնակցեր: Այդ կենտրոնում են պատրաստվում մասնակի զորակոչով զինվորագրվածները:
Բացի այդ, նույն կայազորում նույն օրը մահացել է ևս երկու զորակոչիկ: Մեկի մահը, ենթադրաբար, կապված է ալկոհոլի օգտագործման հետևանքով առաջացած էպիլեպտիկ նոպայի հետ: Երկրորդ զորակոչիկը, ենթադրաբար, մահացել է սրտի կաթվածի հետևանքով:
Պորոշինոյում տեղակայված ուսումնական զորամասում հայտարարվել է ալկոհոլի օգտագործման բացարձակ արգելք այն բանից հետո, երբ մի խումբ հարբած զորակոչիկներ զանգվածային ծեծկռտուքի մեջ են ներքաշվել:
