Ուկրաինացի զինծառայողները մտել են Դոնեցկի շրջանում գտնվող Լիման ավանը, որը ռուսներն այս տարվա մայիսին են գրավել:
Ռուսական իշխանամետ տելեգրամ-ալիքները հայտնում են, որ Դաշնության զորքն արդեն հեռացել է Լիմանից:
«Հաշվի առնելով շրջապատման մեջ ընկնելու վտանգը՝ միութենական ուժերը դուրս են բերվել Լիմանից»,- այսօր հայտնել է Ռուսաստանի պաշտպանության նախարարությունը:
Ուկրաինայի բանակի «Արևելք» խմբավորման հրամանատարության ներկայացուցիչ Սերգեյ Չերևատին այսօր ասել է, թե Լիմանում գտնվել է մոտ 5 և կես հազար ռուսաստանցի զինծառայող: Ուկրաինացիները ռուսներին առաջարկել են միջանցք տրամադրել նրանց դուրս հանելու համար, սակայն ռուսները մերժել են առաջարկը:
Լուգանսկի շրջանային ռազմական վարչակազմի ղեկավար Սերգեյ Գայդայը հայտարարել է, որ հիմա այդ զինծառայողները «կա՛մ պետք է փորձեն ճեղքել ուկրաինացիների դիրքերը և հեռանալ, կա՛մ զոհվեն, կա՛մ հանձնվեն»:
Նախագահ Վլադիմիր Զելենսկին նախօրեին խոսել է Լիմանի ուղղությամբ ուկրաինական բանակի գրանցած հաջողությունների մասին:
Պատերազմի ուսումնասիրության ամերիկյան կենտրոնի փորձագետների համոզմամբ, ուկրաինացիները 72 ժամում լիակատար հսկողության տակ կվերցնեն Լիմանը:
Ուկրաինայի գլխավոր շտաբը սեպտեմբերի 29-ին հաղորդել է, որ ռուսները Լիմանի շրջան են փոխադրում «վատ պատրաստված մոբիլիզացված զինծառայողներ»:
Ռուսական աղբյուրները նույնպես հաղորդել են Լիման նոր ուժեր փոխադրելու մասին, սակայն չեն նշել, թե արդյոք դրանք զորակոչով ծառայության կանչված զինվորներ են:
Անկախ աղբյուրները չեն կարող հաստատել ռուսական կամ ուկրաինական կողմերի հայտնած տեղեկությունների արժանահավատությունը:
Անեքսիայի որոշումից հետո Դոնեցկի շրջանը՝ ներառյալ Լիմանը, Մոսկվան համարում է Ռուսաստանի Դաշնության տարածք:
