Միացյալ Նահանգների պետքարտուղար Էնթոնի Բլինքենը հինգշաբթի օրը հեռախոսազրույց է ունեցել Հայաստանի վարչապետ Նիկոլ Փաշինյանի հետ, հաղորդում է ԱՄՆ Պետդեպարտամենտը:
Հաղորդագրության համաձայն՝ Բլինքենն ամերիկյան կողմի ցավակցություններն է փոխանցել Հայաստան - Ադրբեջան սահմանին վերջերս տեղի ունեցած ռազմական գործողություններում կյանքը կորցրածների համար:
«Պետքարտուղարը վերահաստատեց մեր հանձնառությունը՝ օգնելու Հայաստանին և Ադրբեջանին խնդիրները լուծել խաղաղ ճանապարհով: Նա ասաց, որ դիվանագիտությունը միակ ճանապարհն է դեպի առաջ, և նշեց, որ ինքն անձամբ ներգրավված է մնալու», - ասված է ամերիկյան արտաքին քաղաքական գերատեսչության հաղորդագրությունում:
Հայկական կողմի հաղորդագրության համաձայն՝ վարչապետը մանրամասներ է ներկայացրել Ադրբեջանի կողմից Հայաստանի ինքնիշխան տարածքի նկատմամբ սանձազերծված ագրեսիայի հետևանքով ստեղծված իրավիճակի վերաբերյալ: Փաշինյանը նշել է, որ չնայած սահմանին հարաբերական հանգիստ է՝ իրավիճակը շարունակում է մնալ շատ լարված:
Զրուցակիցներն անդրադարձել են նաև ՄԱԿ-ի Անվտանգության խորհրդին ուղղված ՀՀ դիմումի շուրջ քննարկումներին: Վարչապետ Փաշինյանը ևս մեկ անգամ ընդգծել է տեղի ունեցողի վերաբերյալ միջազգային հանրության համարժեք արձագանքի կարևորությունը:
Սա Միացյալ Նահանգների պետքարտուղարի և Հայաստանի վարչապետի երկրորդ հեռախոսազրույցն է հայ - ադրբեջանական սահմանին ինտենսիվ ռազմական գործողությունների սկզբից ի վեր:
