Գեղարքունիքի մարզի Սոթք գյուղում արկեր են ընկել, «Ազատության» հետ զրույցում ասաց Գեղամասարի նախկին համայնքապետ Հակոբ Ավետյանը:
Ըստ նրա` այս պահին տեղում ինտենսիվ կրակոցներ են, երեխաներից ոմանց տարհանել են, մյուսներին դեռ չի հաջողվել: Ըստ նրա` Գեղամասարի այլ շրջաններում ևս նմանատիպ իրավիճակ է:
Սյունիքի Իշխանասար համայնքի ղեկավար Մարատ Պետրոսյանն էլ հաղորդեց, որ կրակոցները շարունակվում են, զոհերի, տուժաների մասին տեղեկություն չկա:
«Անցած տարի որ 4 ժամ կրակոցներ եղան, նույն կրակոցներն են եղել:
Գյուղի ժողովուրդը ճիշտ է` դուրս է եկել գյուղամեջ, բայց առայժմ դուրս չեն գալիս», - ասաց նա` հավելելով, որ դաշտերում հրդեհներ են բռնկվել:
«Արդեն քաղած չոր խոտեր են, վառվում են, հրետանի է աշխատում», - նշեց նա:
Կեսգիշերն անց Հայաստանի պաշտպանության նախարարությունը հայտնեց, որ ադրբեջանական կողմի լայնածավալ սադրանքի արդյունքում սկսվել է ինտենսիվ փոխհրաձգություն, ՀՀ զինված ուժերը համարժեք պատասխան են տալիս։
Ադրբեջանի զինուժը սեպտեմբերի 13-ին՝ ժամը 00:05-ից, Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից ինտենսիվ կրակ է բացել հայկական դիրքերի ուղղությամբ, մասնավորապես, հայտնել էր Հայաստանի ռազմական գերատեսչությունը:
Ադրբեջանի պաշտպանության նախարարությունը, իր հերթին, հայտարարում է «Հայաստանի զինված ուժերի ստորաբաժանումների կողմից հայ-ադրբեջանական պետական սահմանի Դաշքեսանի, Քելբաջարի և Լաչինի ուղղություններով լայնածավալ սադրանքի» մասին։
