Այսօր Ադրբեջանի վարչապետը առաջին անգամ, հյուրի կարգավիճակով, մասնակցել է ԵԱՏՄ երկրների վարչապետերի ընդլայնված նիստին։ Հանդիպումը երեկ է սկսվել՝ Ղրղըզստանում։
Ալի Ասադովը դրան մասնակցելու հնարավորության համար հատուկ շնորհակալություն է հայտնել Ռուսաստանի և Բելառուսի վարչապետերին։
Ադրբեջանի մասնակցությունը ԵԱՏՄ նիստերին քննարկվում էր դեռ անցած տարվա ապրիլին: Այն ժամանակ, սակայն, Հայաստանը ընդդիմացել էր։ Փոխվարչապետ Մհեր Գրիգորյանը, Հանրային հեռուստաընկերության եթերում, ասել էր, թե Երևանը դեմ է արտահայտվել Ադրբեջանի ներկայացուցչի մասնակցությանը։
Թե Ինչու և երբ է փոխվել Երևանի դիրքորոշումը, դեռ հստակ չէ։ «Ազատությունը» դիմել է կառավարությանը, առայժմ պարզաբանում չենք ստացել։
Մինչ այդ, Ասադովն այսօրվա նիստին շեշտել է, որ Ադրբեջանը գերազանց հարաբերություններ ունի ԵԱՏՄ անդամ գրեթե բոլոր պետությունների հետ՝ հավելելով՝ Բաքուն պատրաստ է ստեղծել բոլոր պայմանները, որ նրանք կարողանան օգտագործել Ադրբեջանի տարանցիկ ներուժը։
Առանց ղարաբաղյան պատերազմը հիշատակելու՝ ադրբեջանցի պաշտոնյան միաժամանակ պնդել է, թե տարածաշրջանում այլևս նոր իրավիճակ է ստեղծվել։
«Տարածաշրջանում ի հայտ եկած նոր իրողությունները լավ հնարավորություններ են ստեղծում տրանսպորտային հաղորդակցությունների ապաշրջափակման, ինչպես նաև նոր տրանսպորտային և առևտրային ուղիների բացման համար», - ասել է Ասադովը։
Ռուսաստանի վարչապետն ուրախությամբ է արձագանքել Ասադովի մասնակցությանը՝ ԵԱՏՄ նիստին։ Երեկ, երկկողմ հանդիպման ժամանակ, Միշուստինը շեշտել է՝ հրաշալի է, որ Ադրբեջանն ուշադիր հետևում է ԵԱՏՄ-ում ինտեգրացիոն գործընթացներին։
Կգնա արդյոք Ադրբեջանը ԵԱՏՄ հարցում ավելի հեռուն, թե կսահմանափակվի «ուշադիր հետևելով» և հյուրի կարգավիճակով նիստերին մասնակցելով, հայտնի չէ, ԵԱՏՄ-ում Բաքվի, օրինակ, դիտորդի կարգավիճակ ստանալու համար, որևէ գործընթաց այսօր չկա, գոնե հրապարակավ։
Հայաստանի վարչապետը, ով նույնպես ելույթ է ունեցել այսօրվա ընդլայնված նիստին, Ադրբեջանի մասնակցությանը չի անդրադարձել, բայց ողջունել է հյուրի կարգավիճակով մասնակցող երկրներին, այս դեպքում դրանք երկուսն էին՝ Ադրբեջանն ու Ուզբեկստանը։
Ինչպես երեկվա ելույթում, այսօր էլ Փաշինյանն ընդգծել է՝ հոռետեսական կանխատեսումները, թե Եվրասիական տնտեսական միության գոտում անկում է լինելու, իրականություն չդարձան, ճիշտ հակառակը՝ 2022 թվականի առաջին կիսամյակում ԵԱՏՄ երկրների հետ փոխադարձ առևտուրը 2021 թվականի նույն ժամանակահատվածի համեմատ աճել է 52,5 տոկոսով և կազմել 1,7 մլրդ ԱՄՆ դոլար։
Նիկոլ Փաշինյանը երեկ էլ Ռուսաստանի վարչապետին է հանդիպել, ու կրկին հայտարարել, թե Հայաստանն ու Ռուսաստանը շարունակում են քաղաքական երկխոսությունն ամենաբարձր մակարդակով։
«Վստահ եմ, որ չնայած բոլոր դժվարություններին, մենք միասին դուրս կգանք իրավիճակից, որը խնդիրներ է առաջացնում մեր տնտեսությունների, մեր համագործակցության համար»,- ասել է Փաշինյանը՝ չմանրամասնելով, որ խնդիրների մասին է խոսքը։
Այսօրվա նիստում Հայաստանի վարչապետը նաև առաջարկել է Միության ներսում գազի ընդհանուր շուկա ձևավորել։ Առաջարկը նոր չէ, սակայն անդամ երկրներին մինչ օրս չի հաջողվում դրա շուրջ համաձայնության գալ։
Միությանը անդամակցում են Ռուսաստանը, Ղազախստանը, Բելառուսը, Ղրղըզստանը և Հայաստանը։
Կազմակերպությունում դիտորդի կարգավիճակ ունեն Կուբան, Մոլդովան, Ուզբեկստանը։
Այսօրվա ընդլայնված նիստի ավարտին կազմակերպության անդամները որոշել են հաջորդ հանդիպումը Հայաստանում անցկացնել։
